Mynta shong kyrain ki nonghikai

Shillong, 26 Naitung:
Ka Federation of All Meghalaya Adhoc Secondary Teachers’ Association (FAMASSTA) ka la pynshai ba ka jingmih khubor hynnin ka sngi ba kam nym shim bynta ha ka jingiakhih jong ki nonghikai hapoh ka lama ka JACATAM kam long kaba shisha.
Ha ka jingpynshai mynta ka sngi, ki nong-kitkam ka FAMASSTA ki la ong ba ka jingmih khubor ka dei ban ialam bakla ia ki paidbah namar ba kumba la iarai naduh u snem 2013, kin bat bad ieng beit bad ka JACATAM.
“La kyrpad ia baroh ki dkhot ka FAMASSTA ba kin iashim bynta shit rhem ha ka jingiakhih kaban sdang naduh lashai ka sngi hapoh ka lama ka JACATAM”, la ong ki dkhot ka Executive Committee ka FAMASSTA ha ka jingpynlait khubor hynne ka sngi.
Lah ban kdew ba hynnin ka sngi, ba ka Kong M Pyrtuh kumba la mih ha kawei ka khubor Khasi, ka la ong ba ka FAMASSTA kala shim ïa ka rai ban ym leit ïashim bynta ha ki prokram jingiakhih jong ka JACATAM, hynrei na ka liang ka Association ka ai pat ia ka jingkyrshan na ka bynta ka jingmyntoi jong ki para nonghikai.
Ha kawei ka liang, ka jingiakhih jong ka JACATAM ban dawa ia ka jingshimti noh ka sorkar ia ka kam hikai skul, kan sdang lashai ka 27 tarik bad ban bteng haduh ka 29 tarik.
Ha kane ka jingiakhih, ar sngi kata ha ka 27 bad 28 tarik kin pynlong shwa da ka jingiashong kyrain ha phyllaw ki skul bapher bapher bad ha ka 29 tarik pat kin ialum lang ha man ki district headquater ha ka jylla.