U CEM ka KHADC, uba pyrshah ia ka roi ka par, ong u Bah Rowel

Shillong, 26 Naitung:
U Bah Pynshngain N Syiem u CEM ka KHADC u la shah takrain tyngeh ha ki nongialam ka Congress ba u dei uba pyrshah ia ka roi ka par jong ki paidbah ka jylla namar ba um shym la ai No Objection Certificate (NOC) ia ka jingshna ia ka surok na Nongstoin sha Maw-thabah-Wahkaji.
Ka jingtakrain ia u Bah Pynshngain ka wan na u nongialam ba rangbah ka party uba dei ruh u Symbud Myntri Rangbah ka jylla u Bah Rowel Lyngdoh, uba la ther ia u Bah Pynshngain kum u briew uba ‘pyrshah ia ka roi ka par jong ki paidbah ka jylla baroh kawei’.
Kane ka jingkren kynthah u Bah Rowel ka long hadien ba u Bah Pynshngain hynnin ka sngi, u la kren hakhmat ki nongialam ka National Highway Infrastructure Development Corporation Limited (NHIDCL) ba don lang u Managing Director ba ka KHADC kan nym ai NOC satia ia ka sorkar ban shna ia katei ka surok .
“U Bah Pynshngain u dei u nongpyrshah ia ka roi ka par jong u paidbah ka ri Khasi Jaintia”, la ong u Bah Rowel haba iakren bad u nongthoh khubor hynne ka sngi.
“Na ka jingpeit jong nga, u CEM ka KHADC u dei u nongpyrshah ia ki kam pynroi ka sorkar bad kumjuh ia ki paidbah ka jylla”, la bynrap u Symbud Myntri Rangbah ka jylla.
U Bah Rowel u la ong, ba kiwei kiwei ki district council ki iatreilang bad kyrshan ia ka sorkar hynrei dei tang u CEM ka KHADC uba ialeh pyrshah ia ka sorkar.
“Ki paidbah ki iohi hi ia ki kam pyrshah kam pynroi u CEM ka KHADC”, la ong u Bah Rowel.
Lah ban kdew ba dang shen wat u Myntri Rangbah ka jylla u Dr Mukul Sangma u la takrain ia u CEM ka KHADC halor ka jingpyneh jongu ban nym ai NOC ban shna surok sha Mawthabah-Wahkaji.
“Lada u CEM ka KHADC um ai NOC, u pyrshah ia ka kam pynroi jong ki paidbah. Um lah ban nym ai”,la ong u Dr Mukul.