Smam shlei ka Hall ha Mairang, rung BJP 2000 ngut ki dkhot ka HSPDP

Shillong,25 Naitung:
Ka Hall kaba la pynlong jingialang da ka seng BJP mynta ka sngi ha Mairang ka la dap smam da ki paidbah kiba la wan sha katei ka jingialang bad ha katei ka jingialang ka BJP ka la pynrung dkhot kumba 2000 ngut ki paidbah kiba la ong ba ki dei ki paid nongkyrshan jong ka seng HSPDP.
Ia kitei ki paidbah na ka seng HSPDP la wan ban ialam da uwei u nongialam radbah ka seng HSPDP u bah C.S Wahlang uba dei ruh u kyrtong MDC ka HSPDP ha u snem 2014. Lah ban pynkynmaw ba ha ka elekshon 2014 u bah Wahlang u la ioh kumba 5000 vote tam bad mynta utei u la leit ia soh sha ka seng BJP ryngkat ki nongkyrshan jong u.
Ki heh ka BJP kiba la donlang ha katei ka jingialang ki long u Shri Ranjit Majumdar Co-Ordinator BJP North East, Dr.N Momin , BJP MLA Assam, Shri Gemes Hanse General Secretary BJP National ST Morcha, u Ma Shibun Lyngdoh, President BJP Meghalaya, u bah David Kharsati General Secretary BJP Meghalaya bad kiwei pat ki nongialam katei ka seng. Katkum ka kyrwoh khubor na u nongaiktien ka BJP u Basu Chakravorty u la ong ba ki la don ruh kiwei pat na ka seng Congress bad na kiwei pat ki seng riewlum kiba la pyniasoh bad ka BJP mynta ka sngi.
Lah ban kdew ba katei ka seng mynta ka la sdang ban suh thied ha kylleng ki konstitwensi bad ki la don bun ki konstitwensi kiba ka la leit ban pynrung dkhot ia ki paidbah, mynta ka kynti katei ka seng ka la rung sa hapoh Mairang konstitwensi.