Khang 5 tylli ki Hotel ha ri Lum Garo

Shillong, 25 Naitung:
Ka Meghalaya Pollution Control Board mynta ka sngi ka la hukum ia ki san tylli ki Hotel ha Ri Lum Garo ba ki dei ban khang noh, kitei ki 5 tylli ki Hotel ki kynthup ia ka Paramount complex, Natraj hotel, Rajkamal hotel, Sundare Hotel bad kawei pat kaba don ha ka kyrteng jong u JR Marak kaba don ha Hawakhana. Ka Board ka la pynmih ia katei ka hukum namarba kitei ki Hotel kim shym la bud beit bud ryntih ia ki kyndon jong ka.
Haba kren sha ki lad khubor u DC ka West Garo Hills u Pravin Bakshi u la ong ba ia katei ka hukum la pynmih hadien ba ka por ba ka board ka la ai shibnai mynshuwa ka la kut noh. U la pyntip ruh ba ia katei ka hukum ka board ka la phah jingtip sha ka ophis jong u bad kumjuh sha ka Tura Municipal Board ba dei ban weng noh ia ka jingai um sha kitei ki Hotel bad sha ka MeECL ba ka dei ban ot noh ia ka bording. Lah ban kdew ba dang shen ki la don haduh 5 tylli ki Hotel ha Shillong kiba ka Board ka la pynmih hukum ban khang noh. Lah ruh ban kdew ba ka NGT ka la hukum ia ka MPCB ba ka dei ban shim jingkit khlieh ban pynthikna ba ki Hotel kin ym pyntuid pathar ia ki um jaboh kiba mih na ki Hotel jong ki namarba ka pynjaboh ia ki tyllong um tyllong wah.