Shah kem u nongtrei Transport, ba bam pisa na u nongpan permit

Shillong, 5 Naitung:
Ki pulit jong ka East Khasi Hills ki la kem ia uwei u nongtrei sorkar halor ka jingkynnoh ba u donkti ban bam pisa haduh T. 10000 hajar na ka bynta ioh permit kali.
Une nongtrei ka tnad Transport department u Bah Deibor Mitre Kyndiah u la shah kem mynta ka sngi, ha ki pulit halor ka jingkynnoh ba u dawa pisa T. 5,000 kum ka installment shwa ban pyndep ia ka T. 10,000 ba u la dawa na u A Arya uba aplai ia ka permit na ka tnad Transport.
U Deibor Mitre Kyndiah u dei na shnong Dulong ha West Jaintia Hills district bad u la shah thung kum u checker ha ka district transport office, u la shah kem ha ki pulit mynta, ka sngi Thohdieng hadien ba u la shim ia ka pisa na utei u nongpan permit.
U Arya u la ujor, ha ka sngi Saitjain ba ha ka sngi Palei, u Deibor u la dawa pisa na u ban ai permit na ka bynta ba u donkam ban shalan ia ki mar.
U SP ka East Khasi hills SP (city) u Bah Vivek Syiem u la iathuh ha ki nongthoh khubor ba ki pulit ka district special cell ki la pynap shrip ia une u nongtrei sorkar bad la kem pyllein pyllein ha ka por ba u shim ia ka pisa kaba T. 5000 kum ka installment ba nyngkong shwa ban siew sa T. 5000 ban pynbiang T. 10000 na ka bynta ban ioh ia ka permit.
U Bah Vivek u la iathuh ba u Deibor u la shah kem ha ka por janmiet mynta ka sngi bad yn rah sha ka Kashari kham janmiet. Ki pulit ki la ioh kurup ruh na met jongu, haduh T. 21,000.
Ka jingshah kem jong une u nongtrei kane ka tnad, ka long hadien ba ki pulit ki la pan ia ka jingiatreilang jong ki paidbah ban iathuh ne pyntip ia ki lada don kino kino ki heh sorkar kiba dawa pisa ban leh ia kano kano ka kam.