Ka jingeh ki paidbah khappud, iathir ka KSU bad ki Rangbah Shnong ha Ri Bhoi

Nongpoh, 19 Naitung: Kum ka jingshim khia halor ka jingeh kaba la ia kynduh da ki paidbah Khasi kiba bashong ba sah ha ki thain Block II khappud bad ka Assam, kiba ju mad ia shibun ki kam leh donbor da ka sorkar Assam, mynha ka sngi Nyngkong ka KSU, Raid Nongtung Circle, ha ryngkat ka jingiatreilang bad ki Rangbah Shnong jong katei ka thain, ki la pynlong da ka jingialang ba kyrpang ha Mawlasnai, na ka bynta ban iathir jingmut bad ha katei ka sngi ki la shim ruh ia san tylli ki rai ban dawa na ka sorkar Meghalaya.
Ki rai kiba la mih ha katei ka jingialang ki kynthup ia ka jingdawa pynrung kyrteng ha ka Electoral Roll ka sorkar Meghalaya ba ka sorkar Meghalaya ka dei ban leh kumba leh ka sorkar Assam da kaba leit sha kitei ki shnong khnang, khnang ban pynsuk ia ki paidbah bad kumjuh ruh ba ki dei ban pdaing tang ki Residential Certificate ba ai da ki Rangbah Shnong.
Ki la shim ruh ia ka rai ban dawa na ka sorkar ban tuklar lem haba iadei bad ka jingdon jong ka Border Police Outpost bad ka khyrdop khrong khajna ka sorkar Assam, ia kaba la buh ha shnong Sabuda, namar ka jingdon jong katei ka Border Police Outpost bad ka khyrdop khrong khajna ba la buh da ka Karbi Anglong Autonomous Council (KAAC) ka pynlong ia ki paidbah ba kin shah thombor bad shah khniot bein ha kiba bun ki liang.
Na ka bynta ka jingsuk jong ki paidbah ha katei ka thain khamtam ha ka por Election, ha katei ka jingialang ki la shim ruh ia ka rai ban dawa na ka sorkar jylla ba ka dei ban buh noh sa ar tylli ki Polling Station, kata ha Ummat bad Umtlih, namar kumba ka long baroh shikatta ha katei ka thain don tang artylli ki Polling Station ha Khyndewso bad Mawlasnai.
Khatduh eh ki la shim ruh ia ka rai ban dawa na ka sorkar Meghalaya ba kan shimkhia haba iadei bad ka Crime Map jong ka Mawlasnai Police Outpost, namar kumba ka long mynta bun na ki shnong Khasi ba hap ha Block II, kim shem la kynthup ha kane ka Crime Map bad kane ka jingbym kynthup hapoh jong ka Crime Map, ka wanrah ruh ia ka jingdkhoh ha ka rukom treikam ki Pulit ophisar lada don kano kano ka jingsniew ha kitei ki shnong.
Kumta na ka liang u President ka KSU, Raid Nongtung Circle, u Samla Edmund Shadap, General Secretary, u Samla Loysius Bina, ryngkat bad ki Rangbah Shnong jong katei ka thain ki la dawa mardor ia ka sorkar jylla ba kan phai khmat lem halor kitei ki jingeh kaba la iakynduh da ki paidbah ha ki thain khappud bad ka Assam.