20 tarik, yn pynshai ki Rangbah Shnong halor ka Weighbridge ha Nongpoh

Nongpoh, 15 Naitung:
Namar ka jingbym hun ha ka jingiakren kaba la khot da u Deputy Commissioner ka Ri Bhoi bad u Commissioner Secretary ka Tnad Transport dang shen ha ophis u DC ha Nongpoh, mynta ka sngi ka Nongpoh Town Committee (NTC) ka la pynlong da ka jingiashong pyrkhat bad ki nongialam ka Dorbar ki Rangbah Shnong Ri Bhoi District (DRSRBD) bad ki Seng Bhalang ban iatai sani halor ka phang ban pyrshah ia ka jingthmu ka sorkar ban buh Weighbridge ha Nongpoh.
Ha kane ka jing iashong pyrkhat ban iathir halor katei ka Weighbridge, la wan ban ruh da u Bah Rocky Kylla Chairman ka DRSRBD, ha ryngkat ka jingdonlang ki nongkitkam ka NTC ba kynthup ia u Bah CB. Syiem, Chairman ka NTC, u Bah Rayonald Khar kamni, Programme and Development Secretary ka NTC, u Bah S. Khar kongor Rangbah Shnong ka Umlyngkdait bad ha kane ka sngi la wan ban mihkhmat ruh da ki nongialam seng ba kyn thup ia u Bah Eddie G. Kharbani, President ka FKJGP, North Khasi Hills District, u Bah Lambok Rymbai, General Secretary ka KSU NKHD, u Bah Marcus Marten na HNYF Northern Region bad u Bah Plielad Tiewsoh, na ka Ri Bhoi Tourism & Environmental Forum.
Ha kane ka sngi, kitei ki nongialam naduh ki nongkitkam ka NTC, ki nongialam ka DRSRBD bad ki nongialam Seng bhalang, hadien ba ki la iashong pyrkhat bad iathir sani bha khatduh eh ki la shim da kawei ka rai bad kata ka long ba kin khot noh da ka jingialang paidbah ha ka 20 tarik mynta u bnai ha ka shnong Umlyngkdait naduh ka por 11 baje mynstep, khnang ba kin ioh ban shim ia ka rai kaba khatduh hakhmat ki paidbah, kum ka jingpyrshah halor ka jingthmu ka sorkar ban buh Weighbridge ha phyllaw ka ophis u DTO, Nongpoh.
Ki la shim ruh ia ka rai ban pynshai sha ki paidbah halor ki nongrim ba kum NTC, ki Rangbah Shnong bad ki sengbhalang ki la pyrshah halor ban buh Weighbridge ha katei ka jaka, hynrei ki la ong ruh ba ka rai kaba khatduh hi kan shong ha ka rai jong ki paidbah.