Kyrshan ka UDP, ia ka KSU

Shillong,4 Naitung:
Ka UDP State Youth Wing ka ai ka jingkyrshan halor ka jingdawa ka KSU na ka sorkar ba ka dei ban pyn sangeh mardor ia ka jingpyntreikam ia ka National Population Register Biometric Enrolment ne ka Unique Identification Number(UID) hangne ha Meghalaya. Ka UDP ka la kyrshan ia ka jingdawa jong ka KSU ba ka sorkar kam dei pyntreikam kyrkieh ia kane ka project ha ka jylla baroh kawei khlem ka jingsngewthuh bad ka jingmynjur da ki trai ri trai muluk bad ka dei ban ia syllok bha bad ki riew shemphang shuwa ban pyntreikam ia ka.
Shuh shuh ka UDP ka la ong ba ka jingplie ia ka jingpyntrei ia katei ka project kan plie lad plie lynti ia ki bar jylla ban ioh ia ka jingithuh na ka sorkar namar kam don kano kano ka nongrim ba khlain ban khang lad lada ki kwah ban ioh pynrung kyrteng ha kane ka project(UID) khamtam hangne ha ka jylla ka bym shym la don satia kita ki lad(mechanism) ban khang ia ka jingiai tuid bad buhai shnong ki bar jylla ha kane ka jylla. Ka UDP ka la kdew ruh ba ka jingbym don u snem ot kyrteng (Cut of Year) ka dei ka jingeh ban pdiang ia kane ka project.

Halor kitei ki nongrim ka UDP Youth Wing ka tyrwa ha khmat ka sorkar ba ka dei ban pynsangeh shwa ha ka ban pyntreikam ia kane ka project bad kyntu ia ki paidbah ruh ban ieng tylli lang kawei ban pyrshah ia kane namar lada ai lad ba kan iaid shakhmat khlem pep ka jaitbynriew rit paid kan kynduh ia ki jingeh hadien habud, katkum ka kyrkoh na u Bah Hamlet Dohling Vice President,UDP
State Youth Wing.