La sdang ka thma siat maw bad siat marble, namar ka surok Wahkaji

Nongstoin, 10 Naitung:
Ka thma ban pynioh bad ban pyrshah surok sha Mawthabah, Wahkaji, ka la sdang naduh myn sngi saitjain bad wat la kam dei satia ka thma ia pyni bor da ka ktien, hynrei, ka dei ka thma pyni bor da ki maw bad ki maw marble bad katei ka la jia ha ka por ba dang pynlong ia ka jingialang paidbah jong ka Joint Action Committee (JAC), ha Iew Nongstoin.
Katba ka jingialang paidbah, ka dang iaid shakhmat, ka la mih ka jing siat da ki maw bad ki maw marble, ba la siat da ki runar lyngba ki kynja jri ia kaba ki la thew pyrshah ruh ban siat ia ki nongialam jong katei ka jingialang.
Katei ka jingwan poi ki maw marble kumba saw tylli ei ei kynthup ruh ia u wei mawria, ka la long tang hadien katto katne minit ba u Chairman ka JAC u bah Ricky Sohlang u dang shim ia ka bynta ban ai jingkren bad ban pynshai paidbah ha kaba iadei bad ka surok Nongstoin – Mawthabah.
Ha kaba iadei bad katei ka jingjia u wei u rangbah shnong ka shnong Domshrah kynthup ruh ia u Nongthoh khubor jong u Rupang, ki la ngat ha ki maw marble ba la siat da ki runar sha katei ka jaka, ha kaba baroh ar ngut, ki la mynsaw malu mala bad don bok ba kitei ki maw kim shym la dei na ki bynta jong ka khlieh.
Ha kaba iadei bad katei ka jingjia, ki pulit ha ryngkat ki bor pyniaid District, ki la pyrshang ban wad ia kitei ki runar hynrei kim shymla lap dien satia namar ka jingbun briew palat ha iew.
Halor katei ka bynta na ka liang jong u Chairman ka JAC ha ryngkat ki dkhot jong ka ki la pynrem jur ia katei ka jingjia bad dawa ia ki bor jong ka ain ba kin leh da kaba tyngeh lada lap kum ia kitei ki runar kiba thmu pynthoh bria iano re iano.