Maham ka KSU ba shong dor u khaw tad T. 10 shi kilo

Shillong, 07 Naitung:
Ka KSU Ranikor circle ka la maham ia ki nongsam marbam sorkar kiba oh dor palat ia ka dor ba la buh ka sorkar ba kan leh da kaba tyngeh lada kin iai bteng ia kane ka kam beain.
Ha ka jingpynlait khubor, u President ka seng u Bah Marcony Thongni u la ong ba ka seng ka la ioh ia ka jingud na kiba bun bah ki paidbah ka thain kum na Phodkroh, Balat bad Ranikor bad kiwei ki shnong ia ka jingdie tam ia ka dor die ia u khaw sorkar. “Ki paidbah ki la ud ba ki nongsam ki la khein dor T. 10 ia u khaw shi kilo uba dei ka dor tang T. 3 shi kilo”, la ong u Bah Thongni.
U la ong ba ka seng ka kyntu ia ka bor synshar district ba kan shim khia mardor ia kane ka kam namar ba ka la ktah jur ia ki briew ba duk na ka jingkhein dor dusmon ki nongsam marbam kiba iaid lait ia ka kyndon National Food Security Act 2013.
Ka la kyntu ruh ia ki nongshim khaw ba kin leit bak bak ban ujor sha ka Deputy Commissioner ba kan leh ia kaba donkam ia kane ia kito ki briew kiba la pynkhein ia ka kyndon ka ain.