Kyrpad ka SBYWA ia ka PWD ban maramot surok

Khliehriat , 7 Naitung:
Ka seng Southern Border Youth Welfare Association (SBYWA), East Jaintia Hills Dist, Khliehriat ha ka khubor ba la pyllait mynta ka sngi lyngba u samla Nam phrangmi L Talang General Secretary jong ka seng u la ong “ Na ka liang ka seng ngi kyrpad ia ka tnad PWD Road ban pynbha bad maramot noh kloi ia u surok Lad Rymbai-Rymbai-Bataw-Borgkhat uba dei u surok uba pyniasnoh shaduh Jhellapur(Assam) uba la sniew bad la jot kaba pynshitom bha ia ka leit ka wan jong ki paidbah jong ka thain khamtam naduh Lad Rymbai haduh Rymbai.
U ne u samla u la ong “Utei u surok LRBBJ ha ki bynta ba dei ban iaid sha ki shnong khappud jong katei ka thain kum ka shnong Hingaria, Huroi, Lailong Laijri ka sorkar ka la iehbein haduh mynta khlem shna kaba mut dangsah hi kum u surok khyndew, kane ka buh jingeh bad ka ktah bha ia kitei ki shnong jong ka thain namar bymbiang u surok ka ktah ruh wat ia ka Khaii pateng, ka ioh ka koit bad kumjuh ha ka liang pang ka shitom jong ki”. Nangta la bteng ruh “Na ka daw bymbiang u surok da hiar ka khaii ka pateng jong ki paidah naba kibriew kiba shong basah ha kitei ki shnong ki long kiba rep kwai bad tympew namar u surok u dei u budlum jong ka roi ka par ha ka thain bad ka jylla hi baroh kawei”. Hynrei ym tang katta ka ktah bha ia ki paidbah khamtam ha ka shitom shipa namar utei u surok uba dei ban iaid naduh Borkhat –Hingaria-Huroi ter ter u dang suk ban leit da u kulai ban ka ba iaid da ka Kali la ong shuh shuh u samla N.L.Talang.
Kumta ka seng SBYWA ka kyrpad jur ia ka tnad PWD Road khamtam ia u Myntri badon burom u Sniwbhalang Dkhar, ia ki Engineer na ka bynta ban pynbha bad maramot noh kloi ia utei u surok (LRBBJ) khnang ba ki paidbah jong ka thain kin suk ha ka leit ka wan ter ter bad ha ka juh ka por ban peit lem ruh ia ki jingeh jong ka thain khappud, la pynkut ka kyrwoh.