Haba nga shong ha ka shuki CEM, ka thong jong nga ka dei ban pyniakhublei kti ia U bah Paul bad U bah Ardent: Adelbert

Shillong,6 Naitung:
U Chief Executive Member (CEM) barim ka KHADC uba long ruh U Working President ka KHNAM u bah Adelbert Nongrum u la iathuh ba haba u shong ha ka shuki CEM ka thong ba hakhmat eh jong u ka dei ban pyniakhublei kti ia u bah Paul Lyngdoh Working President ka UDP uba long ruh u MLA ka Shillong West bad u bah Ardent M Basaiawmoit President ka HSPDP uba long ruh u MLA ka Nong krem. “Haba nga shong ha ka shuki CEM, miet la bad sngi nga pyrkhat ban pyn iatylli ia ka seng UDP bad HSPDP, ka thong jong nga ka long ban pyn ia khublei kti ia u bah Paul bad u bah Ardent, hynrei ka shim por namarba ka donkam ban don ka jing iapyndem iwei ia iwei pat” ong u bah Adelbert Nong rum uba dei ruh u MDC ka Jaiaw Konstitwensi.
Lah ban kdew ba dang shen ka BJP ka la thaw ia ka kynhun ki seng saiñpyrthei ban ia khun pyrshah ia ka seng Congress ha ka thaiñ shatei Lam mihngi bad katei ka kynhun ka dei kaba la tip kum ka North –East Democratic Alliance (NDA) ha kaba na kane ka jylla ki don lai tylli ki seng kiba ia don bynta kata ka UDP,BJP bad ka NPP. Ka jingiakren bad u bah Adelbert ka long halor katei ka nongrim ban kylli na u hato ka KHNAM ruh ka don jingmut ban don bynta ha katei ka kynhun kum ka jingpynkhreh ia ka elekshon 2018 ne hato ka KHNAM ka don jingthmu ne-em ban don ha ka juh ka kynhun ki seng riewlum ban ia treilang ha ka elekshon 2018.
Halor kitei ki jingkylli u bah Adelbert u la ong ba haduh mynta kam pat don kano kano ka jingiakren ban ia thaw kynhun hapdeng ki seng riewlum bad u la ong ba kam pat myntoi ban ia kren ia ka jingiatreilang bad katei ka kynhun NDA haba tang para seng riewlum ruh ym pat lah ban ia tylli, “Haba tang para seng riewlum ruh ngim pat lah ban ia treilang, kumno ngin shaniah ia kiwei pat ki seng,ngim kwah ba ngin long hapoh ka syrngiew jongno re jongno, hynrei kaba nga dang sahnud hi ka dei ban don ka jingiatreilang bad ka jingshaniah hapdeng jong ngi lai ngut ka KHNAM, HSPDP bad UDP” ong u bah Adelbert Nongrum uba la pynpaw ba nalor ki seng riewlum u kwah ba ka NPP ruh kan don bynta lang ha katei ka jingiatreilang.
“Ngi la pyrshang ban pyniatylli ia ki seng riewlum, hynrei ngi iohi ha ki sngi kiba la leit ba ka don ka jingthrang bor, ka jingsliang bor, ka jingkwah burom bad katei ka wanrah ia ka jingiapait ia pra bad ka jingbym shaniah iwei ia iwei, nga sngew ba lada ngi ia tylli ma ngi lain gut da kaba klet noh ia ki jingiapher ka wanrah ka jingiatehsong namarba ka thong jong ngi baroh lai ka long na ka bynta ka jaitbynriew,hynrei mynta ngin wad ia ka daw bad haei ka don ka jingduna” ong biang u bah Adelbert Nongrum uba la ong ba lada ki seng riewlum ki ia tylli mlon khlem pep ha ki snem ban sa wan ki seng riewlum kin ioh ban synshar ha sorkar jylla bad ka District Council ruh kumjuh.
Haba kren ia ka thong ka jong ka NDA ban pynkhyllem noh ia ka seng Congress ha u 2018 u bah Adelbert u la ong “ Ka KHNAM kam kwah bad kam buh thong ban pynkhyllem ia ka Congress lane ban pynjah kyrteng hynrei ka thong hi ka long ban pyndep ia ki ishu jong ka jaitbynriew, namarba 44 snem ngi lah klet ia ka jingmyntoi ka jaitbynriew bad la kynmaw tang ia ka jingmyntoi Party,ki jingmyntoi shimet” u la bynrap biang.
Kum u nongialam jong ka seng riewlum u bah Adelbert u la ong ba u kwah ba ka HSPDP bad ka UDP kin ia sngewthuh jingmut noh , “Dei ban don ka mynsiem pyndem baroh arliang HSPDP bad UDP, ha ka por ba nga long CEM miet la bad sngi na pyrshang ban pyniatylli ia ki 3 Party, kam myntoi ia nga ban pyrta jaitbynriew haba napoh ngi ia dung iwei ia iwei,ngin ym ngeit bad shaniah ha ka syrngiew jong ki Party kiba nabar kum ka BJP bad Congress,lada ngi don jingshaniah para ma ngi ngim donkam ia kiwei pat,la thikna ngin wan ha ka bor,baroh shi katta ngi la shah khyrwait shabi ,ngi la pyndem ia ki ishu jong ka jaitbynriew” ong u bah Adelbert.
Haba la kylli hato ka KHNAM kan shim ia ka bynta ban tyrwa noh da ka kynhun jong ki seng riewlum ha ka elekshon 2018 ka ban kynthuplang ia ka HSPDP bad ka UDP ruh-u bah Adelbert u la ong, “Lada ngin tyrwa ma ngi ka KHNAM, kin ong ka KHNAM aiu kata tang uwei u MLA ruh kam don, ngin ap ia ka dak na ki, hynrei lada kam poi shano shano ruh ngin hap ban leh ia kaba donkam” ula ong. Haba phai pat sha ka jingpynkhreh ka KHNAM na bynta ka elekshon 2018 u bah Adelbert u la ong ba ka KHNAM kan shim tang ia ki briew kiba kynsai kiba don ka nongrim kaba skhem na bynta ka jaitbynriew ym na bynta ka malade , “Kam pher ka la long tang 6 ne 7 ngut ruh,ngin shim tang kiba kynsai” pynkut u bah Adelbert Nongrum.