Set phatok shi jingim, ia uba pyniap dusmon, ong ka Mawlangsu

Nongstoin, 6 Naitung:
Da ki spah ngut ki longkmie kynthup ruh ia ki nongialam Sengbha lang mynta ka sngi, ki la ia mih paidbah ha ka shnong Mawlangsu ban iashim bynta ha ka jingiai iad paidbah, na ka bynta ban pynpaw ka jingpynrem kaba jur ia u runar u ba la pyniap dusmon ia kawei ka longkmie kaba na ka shnong Mawlangsu, bad dawa ruh ban set phatok shi jingim ia u tei u runar khlem ka jingioh jamin.
Ia katei ka jingiaid paidbah, la pyniaid da ka seng longkmie Mawlangsu Area bad ka seng Khasi Students Union Mawthad raishan Circle, ha ryngkat ka jingiadon lang jong I kong Theilin Phanbuh Chair Person ka  Megha laya State Commission For Women, I kong T.T. Swer Joint Secretary ka Lympung ki  Seng Kynthei na Shillong, ka Synjuk ki Rangbah Shnong Mawlangsu Area, ka Seng FKJP Malangsu Unit, ki dkhot jong ka North East Network (NEN), Synjuk Senglong kmie New Nongstoin, bad kiwei kiwei.
La sdang ia katei ka jingia iaid paidbah na iew Mawlangsu ha kaba la ioh sngew ruh ia ki jingpyta kiba jam kiba la sawa “Ngi dawa ia ka hok bad dei ban nym ai jamin ia u runar bad set phatok shi jingim” bad la pynkut ruh ia katei ka jingia iaid rally ha khlieh iew kaba dei ruh ka jaka pynlong ia ka jingialang ha katei ka sngi.
Ka kong Theilin Phanbuh Chair Person ka  Meghalaya State Commission For Women, haba ai jingkren ha katei ka sngi, ka la ong “Ngin mih sha khmat ban long ki sakhi na ka bynta ban pynsaja katkum ka ain ia ki briew kiba leh ia ki kam bymman bad ia ki kam thom bor ia ki kynthei khynnah, bad ka la ong ruh ba lada ngi ia dawa ia ka hok ngi dei ruh ban nymtieng hynrei ngin mih sha khmat ban rat dyngkhong kum ia kitei ki jingjia ym ban shu kut noh tang ha ki jingialang”. Ka kong Phanbuh, ka la ong ruh ba kum ki kmie ki kpa ki dei ban husiar ban peit bha ia la ki jong ki khun ha ka iaid ka ieng ka jong ki kaba manla ka sngi bad ka la ong ruh ha ba ki khun ki kti, ki pyndonkam ia ki mobile phone bad ki internet ka dei ka kamram jong ki kum ki kmie ki kpa ban tip ba ki pyndonkam ha kano ka dur.
Katba na ka liang jong u Ma Manhun Thabah u wei na ki Riew rangbah jong ka thain bad u ba dei ruh u Sordar ka shnong Nongkasen haba ai jingkren u la ong ba kane ka jingiamih paidbah mynta ka sngi kan nym poi shaei shaei lada ngim nud ban sakhi ha khmat jong ka ain bad lada ym don nong sakhi ka ain ka nym lah ban rai pynrem ia ki nongleh kam sniew.
Ha katei ka sngi la ioh ruh ia ka jingkren na I kong Pdianglin Phanbun, I kong I. Nongdkhar Counselor Iohlynti North East Network, u Paiem ka Hima Myriaw, u samla John F Nongsiang President KSU WKH, u samla Jibarpaul Thabah President KSU Mawthadraishan Circle, ki nongialam shnong, ki nongialam jong ki seng longkmie bad kiwei kiwei.