Skhem ki bor pahara khappud, ong ki BSF ha U Lat ha Shella

Shillong,4 Naitung: Hadien ka jing shah thombor ka Dhaka ha ki kynhun lehnoh, mynta ka sngi u Lat ka jylla u V.Shanmuganathan u la leit jngoh ia ka ktem ki shipai BSF kaba don ha khappud ka India bad Bangladesh. Katei ka jingleit jngoh jong u ka dei hadien ba u la dep ban plie ia ka Secondary School jong ka Rama Krishna Mission ha Shella.
La synran ia u Lat da u Inspector General, BSF Meghalaya Frontier ha ka jingleit jngoh jong u ia ka Shella Out Post bad hangtei u la ioh ban ia kynduh markhmat bad baroh ki shipai BSF, kiba don ha katei ka jaka bad u la ioh ruh ban ia kren markhmat bad ki. Ha ka jingiakren bad u Lat ki shipai BSF ki la pynpaw ka jingsngew skhem jong ki bor pahara kiba don ha khappud ha kaba u Lat ruh u la ai mynsiem ia ki namar ka jingkloi jong ki ban shakri ia ka ri da kaba iehnoh ia la ka jong ka ing ka sem. U la kitbok kit rwiang ia kitei ki shipai ba kin lah ban shakri bha ha ka kam shakri jong ki ia ka ri.