Mynta yn pynsngew ki MLA, ia ki jingeh ha u nongpeit ka AICC

Shillong, 04 Naitung:
U nongpeit ba la thung da ka AICC ia ka Meghalaya u Dr CP Joshi u la wan poi ha ka nongbah Shillong ha ka jingwan iuhkjat jongu ha ka sien ba nyngkong naduh ba u la shah thung ban peit ia ka Congres ha Meghalaya.
Ha kane ka jing wan iuhkjat u Joshi un iakynduh ia ki nongialam ka party naduh ki MLA, myntri sorkar, myntri rangbah, president ka MPCC bad ki nongkitkam ka party ban lum ia ka jingtip jongu ia ka jinglong jingman ka party ha kane ka jylla.
Katkum ka khubor, ki MLA ba pyrshah ia u Myntri Rangbah u Dr Mukul Sangma kin sa ioh ka lad ban pynsngew hakhmat u Joshi. Watla ym pat tip thikna ha kano ka rukom ki MLA pyrshah ia u Mukul kin pynsngew ha u heh ka AICC hynrei, la sngewthuh ba ka jingkren kan long halor ka jingthoh ba ki la dep pynher teng ruh sha ka Sonia Gandhi bad u Rahul Gandhi ha kine ki sngi.
U Joshi un don ka jingialang lashai ka sngi bad ki nongialam ka Congress por 11 baje mynstep  ha Congress Bhawan ha kaba yn don lang ki nongialam ka Congress naduh ki nongkitkam ka Meghalaya Pradesh Congress Committee, ki MP, MLA, MDC, District bad ki Block President, ki nongialam ka seng tnad samla ne ka NSUI bad baroh ki chairman ki tnad sorkar.