Dawa ka UDP Mawkyrwat, ban siang rong ia ki surok

Shillong, 04 Naitung: Hadien ka rai na ka sorkar ban shna noh da ka jingkieng kali RCC ha Phodsala bad Jashiar, ka United Democratic Party (UDP), Mawkyrwat Circle ka la dawa na ka sorkar ba kan pyntrei kam noh sa ia kiwei pat ki jingdawa kiba ba la buh da ka party. Na ka liang jong ka UDP Mawkyrwat Circle hapoh ka jingialam jong u bah Commander Shangpliang, u ba long u Chairman, ka la leit rah da ka dorkhas sha u Myntri ka tnad PWD u bah Sniawbhalang Dhar ha ka 15 tarik Jymmang mynta u snem ha ophis treikam jongu ryngkat ki mat jingdawa ki ba bun ha na ka bynta ki kam ban pyntrei ha ka Constituency.
U bah Commander u la ong ba ka party ka dawa na ka sorkar ba kan mang pisa noh na ka bynta ki surok kiba la dep phah ia ka plan mang tyngka (estimate) da ka ophis jong u Executive Engineer jong ka Mawkyrwat bad kine ki surok ki kynthup na ka bynta ban pynbha bad siang rong ia ka surok Mawmitbah, Domwah kaba 1 Km kaba la mang T. 49,99,670/-.Ka party kala dawa ban pynbha bad siang rong iaka surok Larem sha Nongsynrieh kaba 2 Km ba la mang T. 99,90,800/- bad ban siang rong noh ia ka surok na Phodjaud sha Mawrap kaba don 2 km ba la pynkhreh T 1,08,24,000/- nangta ban siang rong noh ia ka surok shnong ha Rangdikhew kumba 2 km ba la mang T 98,57,200/-, ka surok Marshillong – Jakrem kaba 7 km kaba la mang T. 3,29,96,000/-.
U bah Commander shangpliang u la ong ba ka party ka dawa na ka sorkar ba kan ai sanction noh na ka bynta ban pynbha bad siang rong ia ka JR Road lyngba ka Rangmaw-Mawksiar kata 7 & 8th km, 2 km kaba la pynkhreh T .92.17,000/- na ka bynta ban shna home pipe MP2 culvert ia ka surok shnong Mawkohphet kaba 2.15 km ia kaba la mamg T.1,04,41,700/-. Nalor kane ka UDP ka la dawa ruh ban siang rong noh ia ka surok na Mawkyrwat – Jashiar lyngba ka Marshillong kaba 1 km, kaba la pynkhreh T. 44,72,300 bad kumjuh ruh ban pynheh ia ka surok Weiloi- Jakrem Road haduh Wah Rilang kaba pyniasoh ia ka surok kaba shna na ka skhim NLCPR kaba dei na Mawkyrwat sha Rangblang kaba jngai kumba 28 km bad kaba la mang kumba T. 50,75,16,000 /-.