Khlad u samla ba iohtam ki Pulit na Byrnihat

Nongpoh, 03 Naitung:
Uwei u samla uba la ioh tam da ki Pulit ka Byrnihat PS, mynha ka 1 tarik mynta u bnai najan jong ka Meere Petrol Pump kaba don Byrnihat, Ri Bhoi District, u la khlad noh mynta ka sngi ha Civil Hospital Shillong.
Katkum ka tyllong khubor na ki Pulit ka Ri Bhoi, la ong ba dei ha ka 1 tarik u Naitung ha ka por 1.45 ei ei mynstep, ki Pulit ka Byrnihat PS ki la lap ia utei u samla uba la thiah lyngktar ha surok hajan jong ka Meere Petrol Pump, hadien ka jingmynsaw jur bad ka jingphlei snam na ki bynta jong ka khlieh.
Na ka liang ki Pulit, hadien ba ki la iohi ba utei u samla u la mynsaw jur khamtam ka jingphlei snam na khlieh, kumta ki la pynkit noh ia u mar mar sha Civil Hospital Shillong, khnang ban ioh ia ka jingsumar kaba biang.
Hynrei ka jingjur palat ka jingmynsaw bad ka jingphlei snam na ki bynta ka khlieh, kumta utei u samla u la khlad noh mynta ka sngi, kata tang ar sngi ba u la ioh ia ka jingsumar na ki Doctor.
Haba iadei bad kane ka jingjia, na ka liang ki Pulit kim pat tip ia ka daw kaba wanrah ia ka jingmynsaw jong utei u samla, kumta na ka liang ki Pulit ki dang tohkit ban lap ia ka daw jong ka jingmynsaw une u samla uba la duh noh ia la ka jingim.