U Bah Process bad ki nongrep ka Mawlai

Shillong, 03 Naitung:
U Bah PT Sawkmie, MDC Mawlai Constituency, u la ia kynduh kyrpang iaki nongrep ha ki thain nongkyndong kiba shong ba sah bad kiba hap haka Mawlai Constituency. U Bah Sawkmie ha ka jing ïa kynduh bad jing kren jong, u la kyntu ia ki ba kim dei ban iehnoh ia ka kam rep kam riang kaba long u bud lum jong ka jylla baroh kawei. “Nga sngew kmen ban iohi ba ki nongrep jong ngi ki la nang ban rep ha kine ki sngi da kaba rep ia ki jingthung kiba iaid dor hapoh iew hapoh hat kum u sying bad kiwei kiwei de ki jhur ki jhep”, la ong u Bah Sawkmie.
“Ha kajuh ka por ki nongrep jong ngi ha kine ki sngi ki la long kiba stad ha kaban pyniaid iew ia ki mar jingthung khlem da ai lad shuh ia ki briew ba nabar kin shim kabu ha ka liang ka dor ka mur. Bun ki paidbah haba ki thied ki jhur ki jhep ki kwah ban thied ia ki jhur kiba mih na ki shnong ki thaw jong ngi , namar ki tip ba ki long kiba khuid kiba suba bad kiba bang ban bam”, la ong shuh u Bah Sawkmie .
U Bah Sawkmie kum u nongmihkhmat u la kular ba un trei shitom ban thaw ia ki lad ki lynti kumno ban iarap ia ki, ha kajuh ka por ban ia don ryngkat ha kano kano ka por kaba ki donkam ia ka jingiarap jong u. Na ka liang jong u, u la kyntu ia ki samla ba ha kane ka jingkyrduh kam duh jam ba ki dei ban phai sha ka rep ka riang kaba lah ban plie lad plie lynti na ka bynta jong ki ha ka liang ka kam ka jam.