Ngam dei U Actor, hynrei U Active DGP: SK Jain

Shillong, 01 Naitung:
U Director General of Police (DGP) thymmai ba shimti hynnin ka sngi u SK Jain u la ong ba ka kyntien Acting DGP kam iahap dur ban pyndonkam namar ba haba ong Acting ka mut ba shu act. “Ngam dei u Actor hynrei u Active DGP”, la ong u Jain haba kren bad ki nongthoh khubor hadien ba la shimti ia ka kam kum u hehduh jong ka tnad pulit ka jylla mynta ka sngi ha Police Headquarter.
“Ka sien jam kaba ngan shim nangne sha khmat ban pynkhlain ia ka tnad pulit, kyrmen ban bud kiwei ruh ban shimti hadien jong nga, kumba ngi la bud ruh ia ka lynti iaid jong kiba mynshwa”, la ong u Jain.
U Jain uba la wan shimti kum u heh pulit ha kane ka jylla naduh u snem 2009, u la shimti ia ka kam Acting DGP hynnin ka janmiet hadien ba u DGP u Rajiv Mehta u la shongthait noh.
Haba kren ia ka thong jong u kum u DGP, u Jain u la ong ba ka Operation  Hillstorm-3 kaba dang iaid mynta ban kyndang lehnoh ha Garo Hills kan iai bteng beit ha kane ka jingpeit jongu  ruh. “Ka Jingkyndang lehnoh da ka Operation Hillstorm kan iai bteng haduh ban seisoh pura”, la ong u DGP thymmai hynrei um shym la ong ia kano kano ka jingbuh por ban pyntreikam ia kane ka jingkyndang lehnoh.
“Nga kyrpad ia kiba haiing hasem jong ki dkhot seng lehnoh ba kin kiar na kaba iasylla bad ki khun ki kti, ki tnga jongki namar ba kin shah trei ha ka ain bad kim iapher na ki kam ba leh ki riew runar”, la ong u Jain. Ban wanrah ia ka jingtreikam jong ki pulit kaba seisoh, u Jain u la ong ba ka jingkhang jongu ka plie ia ka jingai jingmut bad ka jingiatreilang bad ki paidbah, ki sengbhalang, ki nongialam shnong, ki nongialam niam. “Kan dei ka jingpyrshang jong nga ban wanrah ban tei ia ka jingiajan hapdeng ki pulit bad ki paidbah ban pynthikna ba ka jingsuk kan wan ha ka imlang sahlang bad ka ka jylla baroh kawei”, la ong u Jain. “Nga tyrwa ban don ka jingiasyllok ka jingiakren bad ki sengbhalang, ki kynhun ki nongialam niam, ki riew pawkhmat shisien ha ka shi taiew ban iakren ia ki kam ba iadei bad u paidbah bad ka suk ka sain”, la ong u Acting DGP.
Lah ban kdew ba ka sorkar jylla ka la thoh sha ka sorkar pdeng ban pynjlan por ia u Rajiv Mehta kum u DGP hynrei ka tnad kam pohiing ka ri kam shym la jubab eiei ia kane bad ka sorkar jylla kam banse ban thung noh da u Acting DGP ia u SK Jain uban sa shong thait noh sa katto katne bnai.