Ka Sadew, ka shnong ba lait ka leit bar pathar

Shillong, 01 Naitung:
Ka Joint Secretary, Government of India, Ministry of Rural Development, ka Aparajita Sarangi, IAS, ka la wan jngoh ia ka jylla Meghalaya ha ka Sngi Thohdieng ban wan peit ia ki jingtrei ba la dep bad ki ba dang iaid sha khmat jong ka MGNREGA. Kane ka jingwan jngoh ka long shi bynta jong ka Inter State Exchange Programme jong ka tnad ban kyntiew ia ki nongkyn dong ka sorkar India ha kaba la ia wan da ki nongiashim bynta na ki shiphew tylli ki jylla jong ka ri .
Ha ka jingleit jngoh ka Joint Secretary ka la leit sha ka shnong Sadew bad Mawklot kiba hap ha ka Mylliem C&RD Block, bad sakhi da ki khmat ia ki jingkylla kiba la wanrah ha ki shnong da ka jinglah ban pyntreikam ia ka skhim MGNREGA kumjuh ruh ha ki nongshong shnong. Ka Joint Secretary ka la pynpaw ia ka jingsngewkmen ha ki kam ki jam kiba ki briew ka jylla ki trei kum ka kam ri sniang ri syiar ba la wanrah da ka skhim MGNREGA kaba la ailad ia ki nongshong shnong ban pynkiew ia ka ioh ka kot jong ki nalor ka bai trei jong ka jingtrei kaba 100 sngi shi longing . Ka la iaroh ruh ia ka jingpyrshang da u BDO u Peter Tremi Passah ban sdang ia ka Open Defecation Free Status kaba long ka jingmang tyngka ban pynioh painkhana leit bar ha man ki thliew ing. Ha ka prokram ba la pynlong ha ka jaka ba pyngngad bha jong ka shnong Mawklot, ka Aparajita Sarangi ka la iaroh shi katdei eh ia ka jingpyntrei hok ia ka MGNREGS ha ka jylla. Ka la ong ruh ba kane kan nang ai bor shuh shuh ban nang iai pyntrei ia kane ka skhim ha ka jylla bad ban ban dang bteng ha ki por ki ban dang wan .
Ha katei ka prokram , ka Joint Secretary ka la plie ruh ia u maw nongrim ka BNRGSK Building jong ka Mawklot VEC bad pynbna paidbah ba ka shnong Sadew kum ka shnong kaba lait na ka jingleit bar pathar (Open Defecation Free Village). Ha kane ka jingialang la donlang da u P. Sampath Kumar, Commissioner & Secretary, C&RD Department, U Bah P.S. Dkhar, Deputy Commissioner, East Khasi Hills District, U Khurshid Ahmad, Secretary, Government of Jammu & Kashmir bad i Project Director, DRDA, East Khasi Hills District, i kong P.L. Lawai.