Kyntu ka Synjuk ki Nongshong Shnong Phlangdiloin, ban ai NOC ia ar tylli ki surok

Shillong, 30 Jylliew:
“Ka Synjuk ki Nongshong Shnong Phlangdiloin Area kiba kynthup ia ki 16 tylli shnong ka buh jingkyrpad ia ki bor sorkar kumjuh ruh ka tnad Home Ministry Road Transport & Highways bad kumjuh ia ka KHADC ban ai NOC noh khnang ban ioh pyntrei noh ia ki ar tylli ki surok ki ba la khot tender naduh ka 5 tarik u Jymmang 2014 kata kawei ka ba dei naduh Nongstoin –Wahkaji –Mawthabah bad kawei pat naduh Wahkaji- Phlangdiloin-Ranikor “, la ong Chairman ka Synjuk ki Nongshong Shnong Phalngdiloin Area u Bah C Lyngdoh ha ka jingiakren sha ki lad pathai khubor ha ka sngi Palei.
“Ngi wan sha khmat ban kren sha ki lad ai khubor ban buh jingkyrpad ia kitei ki ar tylli k surok kiba dei ki 2-lane namar ka jingduh jingmyntoi kan long ia ngi ki nongshong shnong kiba shong ha kitei ki thain namar ngi tip ba ka surok ka dei u budlum ka ioh ka kot bad ka jingkiew ha bun ki liang”, ula ong shuh shuh. “Ngi kwah tang ia ka surok bad ha ka tender hi ym shym la kdew ban don kano kano ka jingthmu ban pynpaw ban tih Uranium ia kaba ngin pyrshah ia ka jingthmu ban tih ia u mar poh khyndew u ba don jingma”.
“Ngi kyntu ia ki ba bun ki Seng bad ki Synjuk ban shim ia ki lad pynkiew pynroi ka sorkar khamtam kum ia ka surok ka ba long ka jingkyrkhu khamtam ia ngi ki ki 16 shnong kiba hap ha kitei ki bynta. Kiwei ki pyrshah ia ki ta ki surok 2-Lane hynrei na ka liang jong ngi lada ioh da ka 4-Lane ruh biang palathynrei namar kan ym don kano ka jingdkoh ha ka liang ka jingkiew ha ka ioh ka kot bad ka jingiarap ia u paidbah ha ka leit ka wan bad ka pang ka shitom. Kumta ngi sngew ban duh ei ka bhah kaba 600 klur tam ban pynbha ia kitei ki ar tylli ki surok ka long kaba sngew pang met bad lehnohei shibun na ka bynta jong ngi u paidnonghsong shnong”, la ong u Chairman ia u ba la wan synran lang da ki khlieh nongsynshar shnong jong kitei ki 16 tylli ki shnong kumjuh ki trai jaka.
“Ki shnong ki baheh bad bunpaid ki dei kum ha Phlangdiloin bad Wakaji kiba don palat mar 900 ngut ki nongshong shnong bad haba khein kyllum ka jingdon ki nongshong shnong ha baroh ki 16 shnong ki la jan kot ia ka 4000 ngut. Ngi sngew ba ngi dei ban ia tylli ban kyntu ia ka sorkar ban ialeh shitom ban ai ‘Allotment Order’ noh ia kitei ki surok 2-Lane. Na ka liang jong ngi , ngin sa leit ia kynduh ruh ia u CEM ka KHADC ban pynpaw ia ka jingsngew jong ki na ka bynta kane ka kam ba ngi thmu hadien ka rai ba la shong pyrkhat da ka dorbar jong ki 16 shnong”, la pynkut u Bah C Lyngdoh.