Tuid ki jaboh Marten hapdeng surok bah Shillong-Guwahati

Shillong, 30 Jylliew:
Sa shi kam ar-kam shuwa ban rung hapoh nongbah Shillong, ki briew ba na bar khamtam ki nongwan jngohkai pyrthei kiba wan na kylleng ki jylla bapher bapher ban wan shangkai pyngngad sha kane ka jylla, ki hap ban ring mynsiem da ka lyer pyut kaba sma iwtung kaba wan na ka jaka bret ñiut na Marten. Tang mar ia poi ha Marten ki la set bad khmut bad khmat namar ka jingbym lah shah ia ka jingbeh lyer sma iwtung kaba wan na katei ka jaka.
U nongthohkhubor uba la poi iaid lynti lyngba ka surok bah Shillong –Guwahati u la iohi ba kiba bun ki kali kiba iaid lyngba katei ka jaka ki tap khmut tap khmat tang mar ia poi ha Marten bad la iohi ruh ba kiba bun ki sei khlieh shabar bad kiba kynroi prie. Katei kam dei shuh kaba phylla namar katei ka jingsma iwtung kam long phylla shuh ia ki briew kiba ju leit ju wan lyngba katei ka lynti namarba ka dei kaba ju long ha baroh shisnem lyiur ne tlang.
Kawei pat kaba u nongthohkhubor u la lap pat ka long ba nalor kaba kat katei ka jingsma kaba wan na khyrdop bah ban rung sha kane ka jylla ka la don pat sa ka jingleh khlem akor kaba I saitmet ban peit bad kaba la pynkhlemraiñ ia kane ka jylla hakhmat ki briew kiba wan nabar. La lap ba hapdeng surok bah hajan ka lad ban rung sha poh Marten la iohi ba ki jaboh Marten ki la saphriang lyngktar hapdeng surok, ki plastik, ki niut ki nier khlem don nonglum nongtam. Nangta la iohi sa ki ktieh khyndew, ki sla hapdeng surok kaba tuid na Marten bad kitei ki pynmih ka jingsma iwtung kaba shyrkhei.
Lah ruh ban kdew ba na ka por sha ka por ki sengbhalang ki ju khih pyrshah ia ka jingbym treikam ki kor mashin ha Marten kiba pyndonkam ban tylliat ia ki mar pyut kiba poi ha hospital, hynrei la ioh jingtip ba haduh mynta ruh ka jingbret tiar pyut na hospital ka dang bteng watla ka kor tylliat kam pat treikam. U samla Donbok Kharlyngdoh nongialam ka HYC uba ju shimkhia bha ia katei ka jingbret ia ki jaboh hospital ha Marten u la iathuh ba hadien ka jingiakhih jong katei ka seng la pyntreikam ia ki mashin tylliat jaboh hospital hynrei tang hadien laibnai ki la duh biang bad la ar ne laisien ka la ju long kumne bad kaba u ioh jingtip mynta u la ong ba ki mashim kim treikam shuh.