Watla u Syiem Tirot Sing Syiem u khlad noh na kane ka pyrthei la kumba 178 snem ban sa dap ha kane ka 17 tarik Naitung ha ka jingiakhun pyrshah ia ka sorkar phareng hynrei kaba sngew phylla ka long ba ka sorkar kam don jingmut ei ei ban tei nam kum u kynja mot ia une u riew khraw jong ka jaitbynriew.
Ia une u riew khraw ka jaitbynriew ba la ju rakhe pyndonkam ia ka sngi iap jongu ha ka 17 tarik Naitung man u snem naduh ba u la khlad ha u Naitung jong u snem 1835 ha phatok Dhaka, ka Bangladesh kaba mynta.
Ha ka jingshisha la bun ki mot ba la shna ia u Tirot Sing hynrei kim dei satia ba la shna da ka sorkar. Ki dei ba la shna da ki kynhun bad ki sengbha lang.
Ha ka jingtwad jingmut u Rupang bad ka director jong ka Arts and Culture ka jylla, ka Kong Mat siewdor War Nong bri ka la iathuh ba kat kum ka jing tip jongka, kane ka tnad kaba dei peit ia kane ka kam, kam pat shym la tei mot ia u Tirot Sing, hynrei la ju leh da kiwei ki kam ban pynsah nam ia u.
“Katkum ka jingtip jong nga, kam pat don ka jingtei mot ia u Tirot Sing hynrei kaei kaba ka tnad ka leh ban pynsah nam ia une u riew khraw, ka long lyngba ka jingpynmih da ki phlim (documentary), ki kot bad ki kam da kaba rakhe ia ka sngi jong u”, la ong ka Kong Matsiewdor.
Ha ka jingsngew ka director, ka jingshna mot kam da don jingmut eh lada ym kynmaw ia u hynrei kaba kham kong san ka long ban tei mot da ki kot, ki jingshna phlim bad kiwei ki kam.
Hynrei ka la kubur ba na ka liang ka tnad Arts and culture kam pat don shisha ka jingtei mot ia une u riew khraw bad baroh ki jingtei ba don ha phyllaw ka State Central, Shillong kiba la ai nam ha u Tirot Sing Syiem ki dei ba la shna da ki kynhun bym dei sorkar. U mot ba ieng jrong bha kynjreng ha phyllaw ka State Central dei ba la shna da ka Meghalaya Pradesh Congress kaba la ai nam ia ki lai ngut ki riew khraw ka jylla kynthup u Tirot Sing, u Kiang Nangbah bad u Patogan Sangma. Nangta u mot jong u Tirot Sing ha Mairang la shna da ka Hima Nongkhlaw.
Ka director ka la ong ruh ba katkum ka rai ba la pynmih da ka Supreme Court dang shen, la mana pyrshah ban shna ne tei mot ha kino kino ki jaka paidbah.
Ka la iathuh ruh ba ka tnad ka la noh synniang ruh kum ka jingpynneh pynsah ia ki jaka sah, ki jaka ba pyndonkam da u Syiem Tirot Sing, ki tiar ki tar kum ki krem khnang ba kin long ki nongmuna ia ka jaitbynriew ban ym long tang ki khana puriskam. “Haba ngi pynneh pynsah ia ki tiar ki tar ki jaka ki pute kim ym long shuh tang ki khana puriskam hynrei ki ieng kum ki nongmuna”, la ong ka director bad bynrap ba katkum ka kyndon kano kano ka jaka kaba la dap 100 snem ka jingrem bad kaba idei hadien ba la eksamin, lah ban pynneh pynsah ia ki jaka jong ki jaka hyndai ne heritage site.
Phi don ban ong eiei?