Kam long kaba suk ban pynbakla ia ka CMJ:Mooshahary

Shillong, 2 Naitung:
U Lat ka jylla ban sa mih u RS Mooshahary ha kane ka sngi Hatmajai u la ong ba ka kynrum kynram ha CMJ University kan poi sha kaba kut bad ong ba kam long kaba suk ia ka sorkar ba kan pynbakla ia ka.
U Mooshahary uba la kut ka por jong u ha kane ka sngi Blei, u la ong ba um tharai ba lah ban pyniaid bakla ia kane ka kam bad kan sa poi beit sha kaba kut.
“Kane ka kam kaba dei kaba don kti kiba heh ba hain bad kam long kaba suk ban shu bret sha jaka theh niut”, la ong u Lat.
Haba pynpaw ba ki pulit CID ban kem ia u heh ka CMJ University u chancellor u CM Jha uba phet rieh, u Mooshahary u la ong, “U la dei ban shah kem, nga sngew”.
Ka tnad ka la kem saw ngut ki heh ka CMJ University kynthup registrar Mrinal Kanti Deb, deputy registrar Premlal Rai bad ar ngut ki heh hynrei kim pat ioh kem ia u Jha.
U Lat uba dei U Visitor jong ka CMJ University, u Mooshahary uba thad madan ia ki kynrum kynram ha kane ka CMJ University, u la ai jingmut ia ka sorkar ba ka dei ban pynwai noh ia kane ka CMJ University Act, 2009.