Ther U bah Pynshngaiñ ia ka sorkar jylla ba hiar ka ioh ka kot

Shillong, 27 Jylliew: U Chief Executive Member ka KHADC u bah Pynshngaiñ N Syiem u la ther tyngeh ia ka sorkar jylla ha ka jingkren jong u ha ka sngi rakhe ia ka District Council Day kaba la long mynta ka sngi ha phyllaw ka KHADC. U bah Pynshngaiñ u nongkren kren khadduh eh ha katei ka jingialang u la ong ba ka ioh ka kot ha kane ka ri Khasi ka la nanghiar namar ka jingbym biang ka polisi jong ka sorkar jylla. “Ka ioh ka kot ka la nanghiar hangne ha ri-Khasi jong ngi, la khang dewiong namar bym don ki polisi kiba shai, tyngkhuh ki kam Rangbah shnong badkiwei kiwei” u la ong.
U la kren ruh ba naduh ba la ioh District Council bad naduh ba la ioh la ka jong ka jylla , kane ka jylla kam shym don ia u pud u sam uba shai bad ka jylla Assam, u la ong ba haba tang u pud u sam uba shai ruh um don kumno yn ia kren ia kata ka rukom bat khyndew bat shyiap kaba dei ka kamram ba hakhmat eh jong ka District Council.
Shuh shuh u la ther halor ka jingsahkut ki Bill jong ka KHADC tang hapoh ka tnad district Council Affairs (DCA) bad ka tnad Aiñ (Law dept) ka sorkar jylla ha kaba u la ong “Kumno keiñ ngin ia treikam haba lada shna aiñ ruh ki bill ki sahkut noh tang ha DCA bad Law Dept”. U bah Pynshngaiñ u la ong ba donkam ia ka sorkar ba kan sngewthuh kino ki bynta jong ka sorkar, kino ki bynta jong ka District Council, “Ka sorkar ka donkam ban sngewthuh kaei ka kam jong ka Secretariat, kaei ka kam jong ka District Council,ho, oid ngi sngewthuh ba lada ai lut ha ka District Council kaei pat ka bynta ba ka sorkar kan trei” la ong biang.
U CEM ka KHADC u la pynpaw ruh ha katei ka jingialang rakhe district Council Day ba ka jingdon ka high Court hajan ka pynproh jabieng ia ka Council naba ka hap ban shna ia ki aiñ katkum ki kyndon jong ka aiñ, “Lada ngin ia treikam kan long beit katkum ka section, Clause jong ka riti synshar bad katkum ki kyndon aiñ,hangta ka high court ruh kan ong ho, oid ki la leh ia kaba dei” ong u CEM ka KHADC uba la khot ia ka sorkar jylla ban ia treilang ha la ki jong ki bynta naba u la ong ba kaba kut hi ka dei na ka bynta ka bha ka miat u paidbah.