Suh thied ka HSPDP ha Shella Constituency

Shillong, 27 Jylliew:
Ka Hill State People’s Democratic Party (HSPDP) ha ka sngi Saitjaiñ ka la pyniar ïa ka jaka treikam jong ka sa ha Shella constituency bad pynskhem ruh ïa ki nong kitkam ba thymmai ha katei ka sngi.
Kitei ki nongkitkam ba thymmai ki long President- Bah Komen Lait mon, Vice President – Kong Evandalyne Pyng rope, General Secretary – Bah Sparklestar Wann, Joint Secy –Wanteikupar Swett, Finance Secretary – Bah Omesty Chyne, Organising Secretaary – Kong Arbina Kshiar, Organising Secretary – Bah Pynshngain Nongkynrih.
Ïa ki nongkitkam la pynskhem da u President Rangbah ka party, Bah Ardent Miller Basaïawmoit ha katei hi ka sngi.
Haba kren ha katei ka sngi, ha ryngkat ka jingdon lang u MLA ka Nongstoin, Bah Dios Jyndiang, ka MDC ka Mylliem, Kong Teilinia Thangkhiew bad kwei de ki nongïalam ka HSPDP, u Bah Ardent u la pynshai ruh halor ka nongrim ba ka seng ka ieng kum kata ka seng kaba ngeit ha ka synshar khadar kaba khuid.
U la kren ruh halor ka jingdonkam ka jingkylla ha ka synshar khaddar namar haba peit mynta la iohi sa tang ki jingsniew kiba ktah ia ka jaidbynriew.  U la ong “Ngi donkam ia ka synshar khadar kaba khuid ha kaba ym dei ban don ka jingiuhroit ia uba duk da uba riewspah, uba tlot bor ha uba donbor bad kumta ter ter”. U Bah Ardent u la ong ba ba dei ban long kiba stad ruh haba jied ia ki nongmihkhmat da kaba pynshongrim ia ki mat treikam jong u hynrei dei ban kyntait mardor ia ki kyrtong kiba thong bad pynbieit da ka pisa namar ka vote u paidbah ka shongdor shibun shah ban ia ka 500 ne 1000 tyngka ba ki pynbieit ia phi.Katba u Bah Dios Jyndiang pat u la ong ba kum ki paidbah ki donkam ia ki nongmihkhmat kiba lenlade bad kiba wanrah ia ka roi ka por ha ki shnong ki thaw. Ki paidbah ki dei ban bishar bniah ha shwa ba kin ai ia ki vote jong ki.
Kumjuh ka Kong Teilinia pat ka la ong ba kum ki paidbah ki donkam ïa ki nongmihkhmat kiba nud ban ïa kynduh bad ïa phylliew jingmut ha kino kino ki jingeh ba ki kynduh. “Ngi dei ban long kiba stad ban jied ïa ki nongmih khmat, ba ki dei ban long kiba ai hok ïa ka bhah kaba dei hok jong ki paidbah, kiba ju ïasaid bad sei madan ïa ki jingeh kiba ki paidbah ki ïa kynduh”, la ong ka Kong Teilinia.