Lyngngoh ka Seng Khasi ia ka jingkren ka MDC Nongpoh

Shillong, 26 Jylliew:
Ka Kynhun Ki Tymmen ki San Committee ka Seng Khasi (kmie) Mawkhar ka la pynpaw ia ka jingsngewkhia bad sngew lyngngoh kaba khraw halor ka jingmih khubor ia ka jingkren jong ka MDC Nongpoh konsti twensi ka Kong Rona Khymdeit ba, “Ym ju don tangjait ha Ri-Bhoi”, katkum ka khubor ba la mih ha ka 23 tarik Jylliew, 2016 ha kawei ka kot khubor.
Ka kynhun ka sngew lyngngoh, sngew kyndit bad ruh khlem poi pyrkhat ba ki briew kiba la bat ia ka kyrdan kum ki MDC ki nongthaw ain ia ka riti dustur kin kren ia katei ka phang kaba ktah mationg syndon ia ka riti dustur, ym tang ia ka Ri-Bhoi hynrei ha ka satlak ka bri u Hynniewtrep Hynniewwasa baroh kawei.
Ka kynhun ha ka jingialang kaba long hynne ka sngi, hapoh ka jingialam jong u Rangbah Kworshon Marbaniang kum u Secretary ka la kyntur jur ba ka KHADC khamtam u CEM uba ju sngew khia bha ia ka riti dustur Khasi-Khara ba kim dei satia ban shu bam jakhluit ia ka kat katei ka phang kaba khia thew bad ktah mationg ioh kan ialam bakla pynban ia ka lawei ka jaitbynriew u khynriam u pnar u bhoi u war u paid Khasi baiar.
Kumban shu pynkynmaw, ka KHADC ka la pynkupbor ia ka Seng Khasi lyngba ka jingpynbna paidbah naduh u snem 2005ba kan pyntreikam halor ki Riti Dustur(codify) bad kiwei kiwei ki jinglong tynrai ha kylleng ka ri Khasi, la ong u Bah Kworshon.
Lah ban kdew ba ka MDC ka Nongpoh dang shen ka la kren ha pohh ka iing dorbar ka KHADC ba ha Ri-Bhoi ym ju don ka tangjait namar ba ka kynthei bym dei Khasi ba iashong bad u shynrang Khasi ka kylla jait beit sha u.