Dang wad bniah ka tnad Agriculture ia u jingthung ba pyniap sniang

Shillong,2Naitung:
Ka Agriculture ka tnad kaba dei peit ia ki jingthung jingtep, ka dang wad bniah ban lap ia ka bih kaba don ha uwei u jingthung uba ki sniang ki iap hadien ba la bam ia u. Ia utei u jingthung la wanrah sha kate ka tnad ban lap ia ka bih kaba don ha u ne kiwei pat ki bor kiba lehse ki lah ban don ha utei u jingthung kiba lah ban pyniap ia ki sniang.
La ioh ia une jing thung hadien ba la wanrah ia u sha katei ka tnad da ki nongri sniang kiba la pyntip ba dei hadien ba la bam ia utei u kynbat ba ki ar tylli ki sniang kiba la ri ha ka juh ka sem ki la iap noh. Bun na ki nong ri sniang ki la don ka jingtip ba ka long bih ia ki sniang ban bam ia kitei ki jingthung hynrei namarba la theh phlang ha sem sniang da ki khynnah ki bym ithuh ia u , utei u jingthung u la ngat lang ha kaba ki sniang kiba la bam ia ki phlang ryngkat bad kitei ki jingthung ki la iap tang hadien katto katne kynta.
Ban pynshisha hato utei u jingthung u long bih ne em na ka bynta ki sniang u nongthohkhubor u la leit rah sha ka tnad Agriculture ban leh ia kaba donkam bad ban lap ia ka jingshisha khnang ba kan long ruh ka jingpyntip sha ki paid nongri sniang ia ka jingma jong utei u jingthung. Ki bor ba dei peit ha katei ka tnad thung tep ka jylla ki la iathuh ba kane ka dei ka sien kaba nyngkong ba kin ioh sngew ba don kum uta u jait jingthung ha kaba ki la pynpaw ruh ba hap ban da leh da ki kynja test kiba bniah ban tip don aiu hapoh jong u bad mynta katei ka jingwad bniah ka dang shaid shaid ha kaba shen yn sa tip shaphang utei u jingthung.
Ia kiba kum kitei ki jingthung lah ban shem ha bun ki jaka khamtam ha ki thain Mylliem bad Upper Shillong bad katto katne ha ki jaka sor.