Dang bteng ka jingshalan tuh, ia u Dewiong na Jaintia Hills

Jowai, 24 Jylliew:
Ka jingshalan tuh ia u dewiong na Jaintia Hills sha Assam ka dang iai bteng haduh kine ki sngi wat hadien ka jingpynkut noh ka NGT ia ka jing shalan ia u Dewiong ba la dep buh jingkhien.
Mynta ka step phyrngap, ki pulit ka West Jaintia Hills ki la ioh ban kurup ia ki 4 tylli ki trok kiba kit dewiong bad kiba shallan tuh ia u dewiong sha Assam.
Kitei ki trok ki ba la shah kem ki dei kiba don ia u No. AS01DD-4135 ba niah da u Sbun Siangshai na Wapungskur, AS01DD-0098 ba niah da u Kermiki Shylla na Khliehtyrshi, ka trok AS01BC-3478 ba niah da u Naresh Chettri na Umsning, Ribhoi bad ka trok AS01EC-0717 ba la niah da u Raliang na Moodymmai village.
Ka tyllong khubor ka la iathuh ruh ba man ka meit ki don haduh 20 lane 30 tylli ki trok kiba shalan dewiong tuh na Jaintia Hills sha Assam.
Ki nongshalan tuh ki dei kiba shalak bha bad ban lait na ka jingshahkem ha ki pulit kim shym la iaid na u surok bah, hynrei ki iaid na ki surok shnong. Ki truck ki ju iaid na u Surok Pasyih- Kyndong- Mynso ban mih sha Nangbah bad sha Nartiang. Na Nartiang pat ki mih sha Mawlasnai bad mih sha Byrnihat bad poi sha Beltola Assam.
Ki don ruh ki trok kiba biang ka setting ki iaid na NH-44, la ong ka tyllong khubor, namar kine ki trok kim shah kem satia la ha ki pulit East Khasi Hills khamtam ha Mawryngkneng, ki pulit Ribhoi bad wat ha ki Weighbridge jong ka Transport Department ha Umling.