Ujor ka UDP sha ka sorkar halor ki jingeh ki paidbah ha ki thain Block II

Nongpoh, 24 Jylliew:
Da kaba shim khia ia ki jingujor kaba la ioh na ki paidbah ka thain Block II, haba iadei bad ki jingsha lehdonbor ha ka Assam, hynnin ka sngi ka United Democratic Party (UDP), Ri-Bhoi District, ka la pynher syndon da ka dorkhas sha ka sorkar jylla lyngba u Myntri ba dei peit ia ka Revenue, u Dr. R.C Laloo, kum ka jingdawa ia ka sorkar ba kan shimkhia haba iadei bad ka jingeh kaba la iakynduh da ki paid nongshong shnong katei ka thain.
Ki jingdawa ba hakhmat eh ha katei ka dorkhas, ki dei halor ka jingwan buh khyrdop khrong Khajna beain da ka Assam ha ki lai tylli ki jaka ba kynthup ha Sabuda, Madan Umwang bad Umsyrlieng, ha kaba kine ki jaka khrong khajna ki la khrong bein ia baroh ki jingmih na ki mar rep jong ki paidbah kiba shong basah ha katei ka thain bad kaba kham pynlyngoh shuh shuh ka long ba wat ia kitei ki jaka khrong khajna la pyniaid da ki Nepali.
Shuh shuh, ha katei ka dorkhas la pynpaw ruh ba ki don haduh 17 tylli ki Shnong Khasi ha kitei thain bad kitei ki shnong ki la don naduh ka por ba ka India ruh kam pat ioh ia ka jinglaitluid, ka jinglong tynrai ka don ha ki la ka long ha ka riti ka dustur bad ka ktien ka thylliej kaba ki kren ruh ki pyndonkam da ka ktien Khasi paka, hynrei tang namar ka jingbym shimkhia da ka sorkar Meghalaya, ka pynlong ia ki paid nongshong shnong ha kitei ki thain ba kin shah nion bein bad shah khniot bein ha ka sorkar Assam ha kiba bun ki liang.
Ki paidbah ha katei ka thain ki don la ki jong ki jaka ki puta bad ha ki por ba mynshwa ki im ha ka suk ka sain, hynrei katba nangmih ki sngi ki la shah pyndik ha kiba bun ki liang, kata naduh na ki kynhun seng kaikhlaw Karbi, ki pulit ka Assam bad na ka sorkar Assam, kine baroh ki jia ka long tang namar ka jingbym shimkhia da sorkar Meghalaya.
Kumta, lyngba kane ka dorkhas ba la aiti sha u Myntri ka tnad Revenue, ka UDP Ri-Bhoi District ka la kyrpad jur ia u Myntri bad ka sorkar jylla, ba kan shim khia halor kine ki jingeh ba ki paid Khasi ki ia kynduh ha Block II bad khamtam ban pynsangeh shi syndon ia kitei ki khyrdop lum Khajna ba la buh da ka Assam, ia kaba la ai wai sha ki Nepali kaba long kawei na ka jingeh kaba khraw ba ki paidbah nongrep ha katei ka thain, ha katei ka dorkhas ba la soi da u President ka UDP, Ri-Bhoi District, u Bah Donbok Khymdeit bad u General Secretary ka UDP, Ri-Bhoi District, u Bah Raynald Kharkamni.