Hiar jurip ka FKJGP ia ka DIET ha Ri Bhoi, lap ba don shibun ki jingduna

Nongpoh, 23 Jylliew:
Da kaba shim khia halor ki jingujor kaba la ioh na ki samla pule, mynta ka sngi ki nong ialam ka Federation of Khasi Jaintia & Garo People (FKJGP) North Khasi Hills, ki la pynlong ia ka jingleit jurip ia ka District Institute of Education& Training (DIET) kaba don ha shnong Saiden, Ri Bhoi District.
Ha kane ka sngi ki nongialam ka FKJGP North Khasi Hills District ia kaba la ialam khmat da u Chief Organizing Secretary, Bah Lui Lyngdoh, ha ryngkat ka jingiasynranlang bad ki katto katne ngut ki nongialam ba hakhmat eh ka FKJGP NHKD, ki la lap ruh ia ki jingduna ha katei ka jaka khamtam eh haba iadei bad ka khuid ka suba ha katei ka Institute.
Ha kane ka jingleit jurip, ki nongialam ka FKJGP ki la ioh ruh ban iakynduh ia u Lecturer. B. Nongrum, uba dei u Principal jong katei ka Institute bad ha ka jingiakren bad u Principal, ki nongialam ka seng ki la ioh ruh ia ka jingshai bad tip ia ka daw kaba la pynlong ia katei ka Institute ba kan hap ban mad ia shibun ki jingeh.
Na ka liang u Principal jong katei ka Institute, u la iathuh ba mynta la 3 snem kam shem la don kano kano ka Sanction Scheme na ka sorkar bad dei na kane ka daw ka pynlong ia katei ka Institute ba kan shem jingeh ban pynbiang ia ki jingdonkam ha kane ka jaka, khamtam haba iadei bad ka jingwanrah ia ka jingkhuid ha ki sawdong jong kane ka jaka.
“Hooid ki don ki nongtrei Casual kiba dei ban peit ia ka khuid ka suba ha kane ka Institute, hynrei kine ruh kim shimkhia namar ba kim la ioh ia ka jingsiew na ka sorkar, hynrei lada donkam ban pynkhiud ia ki sawdong jong kane ka jaka ai jinghikai ngi hap ban khot bylla da ki briew ba nabar” ong u Lecturer B. Nongrum.
U la ong ruh ba mynshwa ka ju don ka Central Sponsored Scheme (CSS) na ka sorkar pdeng, hynrei mynta kine baroh kim don shuh bad halor jong kine ki jingeh bunsien hi nga leit iakynduh tang ia ka Director jong ka tnat pule puthi, u la bynrap.
Hadien kane ka jingiathuh da u Principal jong katei ka Institute, ka seng hi ka dap da ka jingsngewkhia halor ka jingieh bein bad ka jingbym phai khmat ka sorkar ia katei ka jaka ai jinghikai, khamtam kaba dei ka jaka kaba ai jinghikai ia ki samla kiba don ia ka jingthmu ban long kum ki nonghikai.
Namarkata, na ka liang jong ka seng ka da kyntu ia ki bor bahalor ba kin shimkhia na ka bynta ban pynbiang ia ki jingduna kiba bun ha katei ka Institute, khamtam haba iadei bad ka umbam umdih lem bad kiwei kiwei ki jingdonkam jong ki samla kiba pule ha katei ka jaka, bynrap u Bah Lui Lyngdoh.