Phet U Tilberth na ing, u phla ba don ba pynshna certificate thok

Shillong, 22 Jylliew:
U Tilberth G Marak, u la phla ba u khlem ioh ia ka certificate thok na ka MBOSE hynrei u la phla pat ba ki don shibun ki certificate kiba don ia ka shap ka muhor jong ka MBOSE ki ba la pyndonkam bakla ia bun ki kyrteng jong ki skul kiba paw ha Norh Garo Hills. U Tillberth U jah ruh na ing naduh ka miet ba la dep hadien ka jing iathuh jong u ha ki dkhot ka Garo students’ Union hapoh ka jingialam u Walseng Akai Neng minja u ba dei ruh u President ka GSU-Tikrikilla Unit, ba ka la don ka jingshah byrngem ha ki nong pynshna thok ia ka Certificate ban nym iathuh briew hano hano ruh hynrei lym kumta un ngat ha ka jing shah pyn-shitom kaba lah ban poi shaduh ka jngiap.
U Tillberth u la ong ruh ha ki dkhot ka GSU ba kan bha ba un shah pynshitom ban ia kaba phla ia ki kyrteng bad ki briew kiba shna ia kitei ki certificate thok.Na ka liang ka GSU lyngba u Walseng ka iathuh ruh ba ka seng ka don ia ka jingsuba ba ia kitei ki certificate la shna bad pynbit pynbiang bha ha ki khappud Assam-Meghalaya bad don ruh ia ka shap ka muhor jong ka MBOSE kumjuh ki muhor jong ki Principal jong kiwei pat ki skul kiba bun ha North Garo Hills.
Ia ki kot bad certificate thok jong u Tillberth ki don mynta ha ka kti ka GSU kaba dang thmu ban phah ejahar ban lap shuh shuh ia ka kynhun jong kitei ki nongshna certificate thok. “Nga la leit jurip ia ki skul bapher bapher bad kumjuh ia ka Sikoam Sec School bad lap ba u Roll No 53851 bad u Registration No 61363 of 2014 u dei hok jong ka Sengrikchi B Sangma, ia kaba u Tilberth u la thep ei ha ki certificate thok jong u ha ka por ba u thep ban rung college ha Tikrikilla College”, la ong shuh shuh u Walseng.Ka seng GSU ka dang wad bniah bha mynta ban lap ia kiei kiei ki jingshisha baroh.