Plie U Bah Hek ia u maw nongrim ka ophis DIPR

Shillong, 22 Jylliew:
U bah AL Hek u ba dei u Myntri ba dei peit ia ka tnad Information & Public Relations (IPR) jong ka sorkar jylla u la buh ia u maw nongrim mynta ka sngi ban shna ia ka ophis treikam jong ka Directorate of Information & Public Relations (DIPR) ha Lower Lachaumiere, Shillong ha ka jingia don lang jong u Chairman ka Meghalaya Government Construction Corporation Ltd (MGCC) u Bah Ronie V Lyngdoh- MLA, ka Commissioner & Secretary ka IPR ka M H K Marak, u Director jong ka IPR u Bah H M Shangpliang, U Deputy Regional Passport Officer & Passport Seva Kendra, u M S Sangma, u Managing Director ka MGCC u Bah S Nongkynrih, ki ophisar sorkar , ki nongtrei ka IPR bad ki nongthoh khubor.
Ka jinglut na ka bynta ban shna ia kane ka ophis kan long T.9.41, 78,000 klur tyngka ha kaba la aiti sha ka MGCC ia kaba la mang ban pyndep ha u snem 2018 . Nalor ka jingthmu ban tei ia ka ophis DIPR, katei ka building kan kynthup ruh ia ka ophis jong ka Meghalaya Integrated Information System (MiiS), ka ophis jong u Commandant Civil Task Forc & Passport Seva Kendra, ka Shillong Press Club bad kumjuh ka ophis jong ka Meghalaya Editors and Publishers Association (MEPA). U Kongsan u la ong ba kane ka ophis trei kam la mang haduh khyndai klur tam ka daw ka long ba kane ka ophis ka long kawei na ki ophis kiba don kam tam ha ka sorkar namar ha ka kin don bun ki jingdon kam kiba ia dei bad ki kam sorkar kiba man ka sngi.
U Bah Hek u la kyntu ia u kontrator ban pyndep ia ka jingtrei haka por ba la buh bad dei ban ai khusnam bad lada ym lah ban pyndep ha ka por kaba la ia kut dei ban dain kuna, ka dei ban don ka jingiamyntoi lang na baroh ar liang ym shiliang shiliang. U Chairman jong ka Meghalaya Government Construction Corporation (MGCC) u bah RV Lyngdoh u la ong ba kane ka ophis treikam kan dep ha ka por kaba la ia kut kata ha u bah Lber 2018 bad u la ong ba bun ki ophis sorkar ki la sah teng khlem dep da ki bun bun snem bad kane ka la wanrah ia ka jingduh nong ia ka sorkar.

U la kdew ba kane ka ophis kaba buh maw nongrim mynta ka sngi ka long ka ophis kaba don kam ha kaba lyngba kane ka ophis ia ki skhim jong ka sorkar baroh la pyntip sha ki paidbah khamtam sha ki nongkyndong ia kane ka tnad sorkar la dei ban niew kum ka tnad kaba kongsan tam. Kiwei kiba la ai jingkren ki kynthup ia ka Commissioner Secretary IPR ka MHK Marak, u Director Bah HM Shangpliang u la ba la kdew ba bun ki director kiba la leit noh ki kwah ban sdang noh ban tei ia kane ka ophis.