Ia ka jyrsieh sia lieh,aiti noh ia ka kaiphod hapoh 2 taiew

Shillong, 21 Jylliew:
Ka Meghalaya High Court ka la hukum ia u Superintendent of Police ka East Khasi Hills ban aiti noh ia ka kaiphod ka jyrsieh sia lieh ka kam thung kam nonghikai ha hapoh ar taiew.
Ha ka jingshong bishar mynta ka sngi ka Kashari High Court ka la pynmih ia kane ka hukum ba ki pulit ki dei ban ai ia ia kaiphod ia ka jingiaid shaphrang ka jingtohkit halor FIR ba la ujor ia ka kam bamsap thungkam nonghikai LP skul kaba la paw pyrthei ha u snem 2009 haba bun ki myntri sorkar, ki MLA khamtam ka myntri ka pule puthi ha katei ka snem ka Kong Ampareen Lyngdoh ka la paw kyrteng ha ka kaiphod ka CBI.
Kane ka hukum jong ka Kashari hadien ba u SP ka East Khasi hills district u Bah Mariahom Kharkrang uba la leit mihkhmat hakhmat ka Kashari hynne ka sngi, u la ai jubab ba u Investigation Officer (IO) uba shim jingtohkit ia kane ka kam, um pat dep ban aiti ia ka kaiphod namar ba khlad kyndit noh u kthaw jongu.
Ka kashari ha ka hukum jongka, ha ka 3 tarik Jylliew mynta u snem ka la btha ia u SP bad u IO ban wan mih dalade hakhmat ka iing Kashari ban aiti artad ia ka kaiphod jong ka jingtohkit jong kane ka kam.
U nongbishar u Justice SR Sen ha kane ka sngi Hatmajai, u la ong “Ia kane ka kam dei ban bishar biang hapoh ar taiew kumba la kyrpad da u Superintendent of Police, East Khasi Hills District, Shillong”.