70tylli ki kali saw khmut, pynsarang kai ka MTC:Ampareen Ki bos kamai, ki dei ban iaid haduh 10baje mynmiet

Shillong, 1 Naitung:
Ka jingsangeh kamai kloi jong ki kali sor kar(SPTS)kala wanrah jingeh shibun ia ki briew khamtam kito ki basah kham pajih. Kane ka jingleit set kali dang kloi than sha sem (jaka set) ka la ktah ia ka leit ka wan jong ki paidbah kylleng ki dong jong ka sor shillong khamtam eh ia kito ki briew ki ba kham teh ha ki kam ki jam.
Ka jingdon jong kine ki kali saw ka long kumba ki shakri tang iaki briew sorkar kiba lait trei dang kloi ym ban shakri ia ki paibah.
Ha ka jingiakren bad u Rupang hynne ka sngi nyngkong ka Myntri jong ka Urban Affairs ka Kong Ampareen Lyngdoh kala iathuh ba kine ki kali la buh khnang na ka bynta ban suk ka leit ka wan jong u paidbah. Ka la iathuh katkum ka jingia lang ba la long kham mynshuwa la iakren ba ki kali sorkar ki dei ban iaid kamai haduh ka por 10 baje da miet. Hynrei katkum ka jingshem jong ki paidbah kine ki kali sorkar ki pynkut pynsangeh noh ia ka jing kamai ka jong tang haduh ka por 8 baje da miet. Ka jingset kloi ia ki kali na kaba kamai ka la ktah shibun eh ia ki briew ki ba sah jngai kum sha Nongrah, Nongmensong, Laban bad ha kiwei kiwei de ki jaka.
Ha kajuh ka por ka Myntri ka la iathuh ba ia kine ki kali saw, ka Sorkar ka la aiti sha ki riew shimet (self help group) ban pyniaid ia ki kali hadien ka jingpyniaid jong ka MTC kam ler.
Ka la iathuh ba hapoh ka jingpyniaid jong ka MTC mynshuwa, ka la sniew haduh 70 tylli ki kali, hynrei mynta ka sorkar ka la pynbha lut ia kito ki kali kiba ka MTC ka la buh pynsarang kai ia ki. “Lada ngi ai pyniaid ha ka MTC kane ka tnat ka hap thaw sa kawei ka tnad ka ban peit ia kane namar ba kam don nongtrei”,la ong ka kong Ampareen.
Shuh shuh ka la iathuh ruh ba shwa ban aiti noh sha ki riew shimet ka sorkar ka la la dep ban pynbha lut ia kito ki kali.
Mynta baroh ki kali ki la don haduh 160 tylli ki kynthup 100 tylli ki bus SPTS bad 60 tylli ki kali rit SSPS.
Lada don kino kino ki jingeh ba ki paidbah ki shem ne ia kynduh ha ka leit ka wan ki paidbah ki lah ban ai jingthoh ne ia kynduh ia ka, la ong ka kong Ampareen.