Kyntu ka RBPM ia ka sorkar ban thungkam pulit da kaba khuid

Nongpoh, 19 Jylliew:
Da kaba sngew khia halor ka jingdon kiba lehkhlieh bad leh buittuh haba iadei bad ki jing thung kam thungjam la ka long ha kino kino ki tnat ophis sorkar ha ka jylla, mynta ka sngi ka Ri Bhoi People Movement (RBPM), kum kawei na ki sengbhalang ha ka Distrik, ka la dawa ia ka sorkar ba kan pynlong da ka jingthungkam kaba khuid bad suba khamtam ha kane ka jingpynbna da ka tnat pulit ia ki khubor laitkam.
Kum ban shu pynkynmaw hangne ba ka tnat Pulit ha ka jylla dang shen ka la pynbna ia ki khubor laitkam ba kynthup naduh ki Sub Inspector, Constable, Mechanic, bad ka Armourer.
Haba iadei bad kane na ka liang u General Secretary ka RBPM, u Bah John Mawphniang u la ong, ba ka seng ka dap shisha da ka jingkmen kaba khraw ban iohi ba bun tylli ki khubor laitkam la pynmih da ka tnad pulit, kaba long ruh kum ka kabu naka bynta jong kito ki khun samla ha jylla hi baroh kawei, khamtam ia kito kiba la pyndep ia ki jingpule bapher bapher.
“Lada ka tnat Pulit bad ka sorkar jylla ka kwah shisha ia ka jingtreikam kaba bha bad kaban ai ia ka jingshakri kaba paka ia ki paidbah ha jylla, ka dei ban jied ia kito ki samla kiba don ia kata ka jingstad bad ka jingshemphang ha kaba thoh ha ki Exam ne Interview” ong u Bah John Mawphniang.
Shuh shuh, ka seng ka dawa ruh ia ka sorkar ba kam dei ban ailad ia kino kino ki nongmihkhmat ne ki ophisar ban leh khlieh ha kaba iadei bad ka thungkam thungjam, hynrei ka jingthungkam thungjam ka dei hi ban long kaba khiud ba suba bad katkum ka jinglah jong ki samla, kiba dei hok ban ioh ia ka kam.
Kumta, ka seng kan sa leit ruh ban ia kynduh ia ka Myntri ka tnad pohing ka jylla ban iakren halor jong kane ka phang, namar kum ka seng kam kwah ban don kano kano ka jingleh khlieh ha kaba thungkam thungjam, namar ka jinglehkhlieh ne leh buittuh ym tang ba ka long ka jingiuhroit ia ka hok jong ki khun samla, hynrei kan pyntlot ruh ia ka rukom treikam ka tnat Pulit ha ka jylla, hynrei ban thungkam hi ban long kakum ka jinglah jong ki samla, pynkut u Bah John Mawphniang.