Phah dorkhas ka KHNAM sha U MR, halor ki Khasi Bangladesh

Shillong, 16 Jylliew:
Ka KHNAM ka la phah dorkhas ha u Myntri Rangbah ka Jylla halor ka jingpynmih hukum ka Dhaka District Administration ban beh noh ia ki 700 tylli ki longing kiba dei ki Khasi kiba la shong ha ki jaka Nahar Punji jong ka Srimangal Upazila ha Moulvibazar la kumba 75 snem. Ka bor pyniaid District ha Bangladesh ka la pynmih hukum ba ki Khasi kiba shong ha Nahar Punji ki dei ban mih ha shwa ka 12 tarik u Jylliew da kaba byrngem ba lada kim mih kin pyndonkam da ka bor. Baroh ki Khasi kiba shong ha katei ka jaka ki dap da ka jingshongsyier bad man ka khyllipmat ki don hapdeng ka jingsheptieng hadien ka jingioh hukum.
Ka KHNAM ka pynrem jur ia katei ka jingleh donbor jong ki bor pyniaid District jong ka Sorkar Bangladesh ia ki Khasi, kiba la im bad bud ia ka riti synshar jong katei ka ri. Ka long kaba pynsgewsih ba ka sorkar jylla kat haduh mynta kam pat kren eiei halor katei ka bynta da kaba ieh noh ia ki khasi kiba shong ba sah ha kitei ki jaka. Ka KHNAM ka dawa ba ka sorkar ka dei ban leh eiei ban pynthikna ba ki jaitbynriew Khasi kiba shong ba sah ha Nahar Punji jong ka Srimangal Upazila ha Moulvibazar kim dei ban shah pyntriem bad ban sha ia ki ban im ka jingim kaba suk khlem don kano kano ka jingma.Kane ka long katkum ka kyrwoh na u Bah Pyndapbor Saiborne, President KHNAM.