Ujor u samla ba lip ding khah-khah ha Nongkrem

Shillong, 10 Jylliew: Uwei u samla na ka shnong Kynton-U-Mon, Nongkrem u bah Joanes Lamare u la ujor sha ka District Consumer Disputes Redressal Forum, East Khasi Hills halor ka jingduh ding kaba khah –khah ha katei ka shnong. Kat kum ka jing ujor ba u la thoh sha katei ka Forum ha ka 19 tarik u bnai ba la dep u bah Lamare u la ong ba ka jingding lip ding ha Kynton –U-Mon ka lasdang naduh ka 16 tarik bad tad haduh ka sngi u ai ia katei ka jingujor ruh kam pat meh ding satia.
U la pyntip ruh ba u la ujor sha u AEE ka Mawryngkneng (D) Sub-Division kaba dei peit ia katei ka thaiñ hynrei ka jubab ba la ioh ka long ba dei na ka daw ka jing duh kawei ka mashin.Utei u samla u la ujor ba ka jingduh ding ha katei ka shnong kam dei tang kaba mynta shisien hynrei la ju jia na ka por sha ka por bad u la ong ba katei ka jinglip ding ka la ktah jur ia ki paidbah kiba hap ban shaniah ha ka bor ding naduh ka shet ka tiew, kiba shna jingshna, kiba tan um bad ka ktah jur eh ruh ia ki khynnah pule ha ki skul bad kolej.
Hadien ba la ioh pdiang ia katei ka jingujor ka Consumer Forum ka la khot hajir ia ka tnad MePDCL kaba sam ding ha kate ka thaiñ ha kaba ka la ong ba katkum ka section 12 jong ka Consumer Protection Act 1986 ka Forum ka la ioh jingujor halor ka jingbym pynbiang bording. Ka Forum ka la khot hajir ia katei ka tnad mynhynin ka sngi ka 9 tarik u jylliew ha ka por 3 baje nohphai sngi bad la phah ia katei ka shithi khot hajir ha ka 25 tarik u jymmang,2016 ha kaba la khot ia katei ka tnad ba kan ai jingshai halor katei ka jingbym lah pynbiang ding jong ka. Hynrei ha katei ka jingtian bishar la ioh jingtip ba ka Forum ka ailad ia katei ka tnad ba kan ai ia ki daw jong ka bad ba kan ai ia ka jubab jong ka bad la rah biang ia ka sngi tian bishar sha ka 30 tarik mynta u bnai.
Utei u samla u la pynpaw ka jingsngewdiaw ba ha kum katei ka jingeh ba ki nongshong shnong ki ia kynduh pynban u nongmihkhmat jong ki um shym leh eiei hynrei ki paidbah ki hap ban shimia ka jingkitkhlieh ban mih shakhmat na ka bynta ban ia khun ia ka hok jong ki.