Plie U Bah Lapang, ka ‘Khnap Thangbru’ ha Nongpoh

Nongpoh, 09 Jylliew:
Kan da long ka jingkmen kaba khraw ia ki briew na ka Niam Hindu ha ka thain Nongpoh, ha kaba ka Nongpoh Town Committee (NTC) mynta ka sngi ka la ioh ban plie paidbah ia ka jaka thang briew ne ka ‘Khnap Thangbru’ kaba don ha Umshangling kaba jngai tang kumba 4 KM na Sor Nongpoh.
Ia katei ka ‘Khnap Thangbru’ kaba la tei katkum jong kane ka juk ba thymmai ha ka jinglut kaba la kot sha ka T. 25 Lak, ia kaba la iarap da ka sorkar lyngba ka Forest Department, la wan ban plie pyrda da u Dr. DD Lapang, MLA ka Nongpoh kum u kongsan, ha ryngkat ka jingdonlang jong u MLA ka Umsning, u Dr. Celestine Lyngdoh kum u symbud kongsan.
La sakhi lang ruh ha kane ka sngi da ka jingdonlang ka Kong Rona Khymdeit, MDC ka Nongpoh Constituency, ka Dr. Pooja Pandey, DC ka Ri Bhoi District, u Ma O.R Challam president ka Sein Raij Jowai, ki nongkitkam ba ha khmat ka NTC ba kynthup ia u Bah C.B Syiem, u Bah Raynold Kharkamni, Development Secretary, ki ophisar sorkar, ki dkhot jong ka Hindu Society na Nongpoh, ki heh nongialam ka Central Puja Committee na shillong lem bad kiwei kiwei ki riew rangbah jong ka thain Nongpoh.
U Bah Lapang haba kren kum u kongsan ha kane ka sngi, ha kaba nyngkong eh u la ai ia ka jingiaroh kaba khraw sha ka tnat Forest, kaba la shimkhia ban shna tei ia katei ka ‘Khnap Thangbru’ kaba long ruh kum kawei na ki lad ban iada mariang, namar ka jingdon jong kaba kum katei ka jaka thang ia ki metiap, ia kaba la shna ha kata ka rukom kaba janai, kan kham pynduna ruh ia ka jingpom ia ki dieng ki siej.
Kumta u kyntu ruh ia NTC kaba dei ka nongpeit nongkhmieh ia katei ka jaka bad iaka Hindu Society Nongpoh kaba pyndonkam ia katei ka ‘Khnap Thangbru’ ba kin sumar bha khnang ba katei ka jaka thang metiap kan neh slem, u la bynrap.
Ha kane ka sngi, la ioh ruh ia ki jingkren na u Dr. Celestine Lyngdoh, u Ma O.R Challam lem bad kiwei kiwei, kiba la pynpaw ia ka jingkmen halor ka jingdon jong katei ka ‘Khnap Thangbru’ kaba long ruh ka jingmyntoi kaba khraw ia ki briew na ka Niam Hindu jong ka thain Nongpoh, namar baroh shi katta ki shem jingeh haba wan kino kino ki jingiap briew tang naka jingbymdon jong ka jaka thang briew kaba biang ki hap ban leit thang shaduh Byrnihat.