U CP Joshi, u nongpeit ia ka Congress ha Jylla

Shillong, 09 Jylliew:
Ka jingiakhih jong ki MLA ka Congress ka lah ban sdang biang hadien ba ka AICC ka la thung ia u nongpeit jongka ha kane ka jylla ia u Dr CP Joshi uban mih bujli ha jaka jong u V Naraswamy u la shah bynshet noh ia ka kam nongialam jong ka party ha Pudecherry.
Katkum ka khubor ka AICC ka la thung ia u Dr Joshi bad ka la phah ia ka jingtip sha ki heh ka Congress ha kane ka jylla.
La sngewthuh ba une u nongpeit nongkhmih ia ka Congress ha kane ka jylla, un sa wan jngoh shen ia ka jylla Meghalaya ban bishar ia ka jinglong jingman jong ka party ha kane ka jylla bad un iakynduh ia ki MLA ki nongialam party.
Ka jingthung ka AICC ia u nongpeit ka long kaba donkam bha ha kane ka kynti hadien ba la mih ka kynrum kynram ha ka party Congress kham tam ki MLA kiba dawa ban weng noh ia u Mukul Sangma kum u nongialam ka party hadien ba la mih ka jingshah rem kput ha ka elekshon MP dang shen na Tura bad kumjuh ki daw.
Shwa ia kane, u president ka MPCC u Bah DD Lapang ha kane ka taiew u la her khari khari sha New Delhi ban kynduh ia ka Sonia Gandhi bad u Rahul Gandhi ban iakren ia ka jinglong jingman ka sain pyrthei ha kane ka jylla khamtam ha ka party Congress.
Wat u Myntri Rangbah u Mukul u la phah jingthoh sha ka AICC dang shen uba la iathuh ba ka party BJP ha kane ka jylla ka la pyrshang ban pynkhyllem ia ka sorkar ba ialam da ka Congress.