Shillong, 30 Jylliew:
Ka jingialang jong ki 45 tylli ki shnong ka thain Sohra kan long ha ka 4 tarik Naitung ha Sohra ban iakren halor ka jingshah knieh ka bhah ba T. 27 klur na ka sorkar jylla ba dei jong ka thain na ka skhim Sohra Ecological Project.
Ha kane ka jingia kynduh, ban wan ki nongkitkam shnong na duh ki rangbah shnong, sordar kiba hap ha ka Sohra Civil Sub-Division kan iakren sani halor ka jingknieh syndet ka sorkar haduh T. 27 klur kaba la ai ia ka thain Sohra.
U Asst secretary ka Synjuk ki Khlieh Nong synshar shnong, Sohra u Bah Ethelbert Sawian u la iathuh ba ka jingiakynduh kan long ha ophis u Syiem ka Hima Sohra por 1 baje janmiet.
Lah ban kdew ba ka Synjuk kham mynshwa ka la dep phah ka jingthoh sha sorkar jylla ban pyrshah jur ia ka jingshim noh ka pisa ba la mang ia ka thain Sohra.
La rai ruh ban leit wad shaei katei ka pisa ka leit balei ka sorkar ka shim noh ia katei ka T. 27 klur. Ym tang katta, ki la rai ruh ban pynlong da ka jingiakhih halor kane ka jingshah knieh syndet ka hok jongki.
Ia kane ka projek la ai da ka sorkar pdeng ban pynjyrngam ia ka thain Sohra kaba jur slap tam ha ka pyrthei hynrei ka tyrkhong um kaba la wanrah ka jingeh ia ki paidbah ka thain Sohra.
Ka tnad Soil and Water conservation ka la pyntreikam ia kane ka skhim ryngkat ka jingiatreilang bad ki bor shnong ka thain Sohra.
Phi don ban ong eiei?