Shim shuti u ophisar, sah kut ki kam ha West Khasi Hills

Nongstoin, 07 Jylliew:
Ki paidbah ka thain West bad South West Khasi Hills, ki la ia kynduh bad mad ia ki jingeh halor ka jingbym don u Ophisar Incharge ka tnad Labour u ba don bor ban soi (sign) ia ki kot ki sla ha kaba dei bad ki License, kot kali MLMTU bad kumjuh ban pyn thymmai ia ki License, nongtrei ia kaba la tip kum ka Meghalaya Building Workers Welfare Board, ki dukan ba la tip kum ka Shop Establishment.
Kumta halor kitei ki jingeh ba ki paidbah ki ia kynduh ka seng Federation Of Khasi & Jaintia People FKJGP ha ka 3 tarik u Jylliew hapoh ka jingialam jong u Spailos Diengngan, Education Secretary West Khasi Hills bad Morningstar Puwein, Information Secretary West Khasi Hills kala leit ban iakynduh ia u Labour  Commissioner ha Shillong.
Katkum ka kyrwoh na u samla Wadbor Nongphud Asst Secretary FKJGP WKHD u la ong ba ha katei ka jingleit ia kynduh jong ka seng ia u tei u Labour  Commissioner na ka liang jong ka seng ka la dawa ba dei ban thung noh ia u Ophisar Incharge ba shipor namar ba ki paidbah ki shem jingeh palat halor ka jing bym don ban soi ia ki kot ki sla naduh ba U GM Pakyntein Deputy Labour Commissioner, uba wan shimti ia ka kam u la shim shuti noh na ka daw ba ka jingpang ka jong u.
Shuh shuh u la ong ruh ba na ka liang jong utei u Labour Commissioner u la kular ban phah noh ban aibor noh ia uno uno u ophisar ban soi ia ki License bad ia ki kot ba donkam hapoh shitaiew.