Ki khlieh nongsynshar kim lah ban tuklar ia ki skhim pynroi:Rowell

Shillong, 30 Jylliew:
U Deputy Chief Minister ba peit ia ka tnad Soil and Water Conservation department u Bah Rowell Lyngdoh u la ong ba ki Khlieh Nongsynshar shnong kim lah ban tuklar ia ka sorkar haba ka pyntreikam ia ki skhim pynroi bad kino kino ki projek.
“Ka long shisha kaba sngew sih ba ki Khlieh Nong synshar hapoh ka Soh ra Sub Division kin khot ia ka dorbar Hima ban batai ia ka sorkar kumno ban pyntreikam ia ka skhim sorkar”, la ong u Bah Rowel ha kane ka sngi u Blei.
Da kaba ong ba kam long kaba dei ia ki Khlieh Nongsynshar ban leh ha ka ne ka ru kom, u Bah Rowel u la ong ba ki Khlieh Nong synshar kim lah ban len ba ka dei ka mon laitluid jong ka sorkar jylla haei bad kumno yn pyntreikam ia ki skhim sorkar.
“Ngam tharai ba ka sorkar ka donkam ia ka jingai jingmut jong ki khlieh nongsynshar shnong ban pyntreikam ia ki skhim pynroi. Ngi don ka Planning bad ka Finance department ban leh ia ka kam” la ong u Deputy Chief Minister.
U Bah Rowel u la ong, “Ngam don jingeh lada u MLA u rah ia ka jingkylli kumno ban pyntreikam ia kano kano ka skhim”.
Haba kylli kaei ka daw ba pynlong ia ka sorkar ban knieh noh ia ka T. 27 klur ba la mang ia ka Sohra Ecological Project, u Bah Rowel u la ong ba kam don kano kano ka daw kaba shai namar ba ia ka pisa la weng na ka bynta ki katto katne ki projek ba donkam kyrkieh jong ka sorkar.
“Hynrei ka jingweng ia kane ka pisa kam mut ba ka sorkar ka la ieh noh ia ka Sohra Ecological Project. U Myntri Rangbah u Dr Mukul Sangma u la dep pynthikna ba kane ka projek kan bteng” la ong u Deputy Chief Minister.
Lah ban kdew ba 45 tylli ki shnong ka thain Sohra kin iakynduh ha ka 4 tarik Naitung ban iakren ia kane ka rai ka sorkar ban knieh noh haduh T. 27 klur ka pisa kaba la mang na ka bynta ka Sohra Ecological Project.
Kham mynshwa ki Khlieh Nongsynshar ki la thoh sha u Myntri Rangbah ha ka 27 tarik Jymmang da kaba kyrpad ba un sangeh ban knieh ia katei ka bhah jong ka Sohra kaba T. 27 klur ba la mang na ka Sohra Ecological Project.
Ki Khlieh Nongsynshar ki la ong ba kane ka projek kan long kaba donkam eh ia ka Sohra bad bynniaw ia kane ka rai jong ka sorkar ban pynduh ia ka hok jongki khlem ki daw kiba biang.
Kham mynshwa, ki MDC ka KHADC kim sngew tynnad ia ka shithi ba la thoh da u Under Secretary ka Soil and Conservation uba la bthah ia u secretary ka KHADC ban thoh sha ki Khlieh Nongsynshar ka Sohra Sub Division ban ym tuklar ia ka jingpyntreikam ia kane ka skhim sorkar.
Ki la dawa ba ka sorkar kam dei ban niew poh ia ki khlieh nongsynshar bad dawa ba ka sorkar ka dei ban weng shi syndon ia ka jingkren kynthah ia ki khlieh nongsynshar.