Shah bom shnong u nongtuh kali ha Umsning

Nongpoh, 28 Jylliew:
Uwei u nongtuh kali uba dei u bar jylla mynta ka nohphai sngi, kumba ha ka por 3:30 ei ei, u la shah bat noh ha ki paidbah ka Umsning, katba u dang thmu ban rong ia ka kali sumo kaba don ia u number ML10 A 1738, kaba dang ieng ha Stand Sumo Umsning.
Katkum katkum ka khubor ba la iohlum, la ong ba utei u nongtuh u ba ym pat ioh satia ia kyrteng jong u, kat haduh ba thoh ia kane ka khubor, u la thmu ban rong tuh ia katei ka kali kamai kaba dang ieng ha ka jaka ieng kali kamai na Umsning sha Shillong, katba u nongñiah kane ka kali u dang pynieng ia katei ka kali kamai ha katei ka jaka, hadien ba u dang shu hiar na Shillong ban ap pali ban kiew biang sha Shillong.
Hynrei katba u nongñiah u dang hiar na kali bad ieng kai bad kiwei pat ki para nongñiah kali, utei u nongtuh bar jylla u la shim kabu da kaba rung hapoh katei ka kali kamai bad pyrshang ban rong tuh ia ka. Ha kum katei ka por, kiwei ki para nongñiah kiba la iohi ia kane ki la hylla ia u bad iathuh ba la don ba rah ia ka kali ba u ñiah.
Pynban ha kum kata ka por, utei u nongtuh bar jylla, u la leit tynrah pynban ia kawei ka dukan kaba don mar shiliang surok, hajan ka dukan RJ Lyngdoh, kaba don ha Umsning. Dei ha kum katei ka por, ki paidbah ym tip nangno ki la mih, ki la leit ban bom jem ia utei u nongtuh kali, uba la pyrshang ban krad ha katei ka por.
Donbok ba utei u nongtuh u lait thaw na ka jingiap ha ka kti ki paidbah, hadien katto katne por ba la wan shimti noh da ki pulit ka Umsning Out Post bad rah syndon ia u sha thanat ban pynlong ia ka jingtohkit.
Na ka liang ka HNYF, Umsning Circle, haba ioh iakren bad u Samla Bantei Umbah, President, u la ong ba ka seng ka maham ia baroh ki nongñiah kali ha sor Umsning ba kin long kiba phikir bha ban pynieng kali ha katei ka sor, namar ka jingjyllei palat ki nongtuh ha kine ki sngi, kaba kim tieng shuh wat ban tuh pylleiñ pylleiñ wat ha ka por mynsngi ruh.
U la bynrap ruh ba ki nongñiah kali kim dei ruh ban ieh ia u shabi kali ha ki kali jong ki, ha ka por ba ki mih leit donkam shabar, hynrei ki dei ban rah lang ia u shabi kali, namar ka jingstad palat ki nongtuh, khamtam ba ka sor Umsning mynta ym ithuh shuh uno u briew uba bha bad uno u briew uba sniew, ba la jyllei sa ki dkhar kiba wan bylla na kylleng ki jaka.