Kular U Mukul ban pynkiew tulop ia ki nonghikai

Shillong, 3 Jylliew:
U Dr Mukul Sangma u la kular ban pynkiew noh ia ka tulopki nonghikai skul Adhoc ha ka jingleit ia kynduh jong ki mynta ka sngi ia u. Ki nonghikai skul Adhoc ha ka lama jong ka Federation of All Meghalaya Adhoc Secondary School Teachers Association (FAMASTA) hadien ka jingiakynduh jong ki bad u myntri rangbah ka jylla ki la iathuh ba u myntri rangbah u la kular ban pynurlong ia katei ka jingdawa jong ki.
Ki don 2352 ngut ki nonghikai kiba hikai ha ki 434 tylli ki skul Adhoc (Secondary School), ka tulop ba la siew sha ki nonghikai ka long tang T.1800 tyngka hynrei khma hadien la kyntiew sha ka T.10,000 tyngka shibnai bad katei ka T.10,000 ka la neh haduh mynta. Ki nonghikai ki la pynpaw ba ki kwah ba ka sorkar kan pynkiew noh ia ka tulop jong ki sha ka T.20,000 tyngka shibnai ryngkat bad kiwei pat ki jingmyntoi ba dei ban ai sha ki.