Iapher jingmut U Bah Prestone bad U Bah Ronnie

Ban long MDC bad MLA u juh u briew
Shillong, 28 Jylliew:
U MLA ka Mylliem u Bah Ronnie V Lyngdoh u la ong ba ym sngew iahap ia ka jingong ba uwei u briew u bat ar tylli ka kam.
“Ngam iohi ei ei ba kan don ka jingeh ban long MLA bad ban long MDC ha kajuh ka por. Ha ka jingshisha nga sngew ba ka long kaba bha lada ujuh u briew u mihkhmat ia ka constituency ha Assembly bad ruh ha District Council namar ba un lah ban iakren ia ki jingeh jong ki paidbah kham bha” la ong u Bah Ronnie ha kane ka sngi Thohdieng.
U la pynpaw ia ka jingbym iahap ban phah ia ki briew kiba duna ka jingstad sha ka District Council.
‘Ka The Autonomous District Councils (ADCs) ka dei ka met kaba peit ban iada ia ka riti dustur jong ka jaitbyntriew ha kane ka jylla. Haba shim ia kane ka phang, nga sngew ba ka kham long donkam ban phah ia ki briew kiba stad bad shemphang sha District Council wat ha Assembly ruh” la ong u Bah Ronnie.
U MLA ka Mylliem u la pynpaw ia ka jingsngew khia halor ka jingpyrshang jong ki bor ban pyntlot ia ka district council ban duh noh ia ka.
“Nga sngew ba ka long kaba ma shibun ban pynduh ia ka district council. Ngi dei ban pyrshah jur ia kane ka jingthmu ban pynduh iaka district Council” la ong u Bah Ronnie.
Dei na ka jinglong ba kordor jong ka Council, ba donkam ban don ki briew kiba stad bad shemphang ha ADC khnang ban rah ia ka nam bad ka rukom treikam sha jrong.
Halor kumno u sngew halor ka elekshon MDC, un iakhun ne em, u Bah Ronnie u la ong ba um pat rai namar ba kan shong ha ki paidbah.
U Bah Ronnie u la jop MDC ha u 2004 haduh 2009. U la rem noh ha u 2009 ha ka Kong Teilinia Thangkhiew.
Hynrei ha kawei ka liang, u MLA ka Pynursla u Bah Prestone Tynsong um iahap ia ka jingsngew ban bat uwei u briew ar tylli ki kam.
U Bah Tynsong u la ong ba u la shah takrain ha ki paidbah ka constitency ha ka por ba u long MLA bad MDC. Ha man ki jaka ne ki iing iap briew, la ju shah kylli ha ki paidbah ba kumno u MLA um ai lada da kiwei ban kit lem ia ka lyngkor.
U la ong ba ka long kaba eh ia u MLA ban trei ia ki kam ha kajuh ka por kum u MDC khamtam lada u MLA u shah jied ban long minister.
“Dei na kane ka daw ba nga khlem iakhun elekshon MDC shuh ha u 2009”, la ong u Bah Prestone ha ka por ba iakren kham mynshwa, halor kumno u sngew ia ka jingbat ar maloi.