King ba iong 7ngut, ki MDC kiba la dep risain

Shillong, 02 Jylliew:
Ka jingrai pyn ksan u Lat ka jylla ia u CEM ka KHADC u Bah Pynshngain N Syiem, ba ka District Council kam hap ha ka kti ka  sorkar jylla, ka la pynking baiong ia ki 7 ngut ki MDC kiba la risain tang namar ka jingshah pyntieng koh tympan ha ka ain mait kyrteng jong ka sorkar MUA-II.
Mynta, kine ki la sah ha umdum bad kylla babe ei kha ma kha ha ka ain pyntieng u Myntri Rangbah u Mukul Sangma, haba ka la kylla kam kai khlem lerkam.
U Bah Metbah Lyngdoh u MDC ka UDP na Mairang ba la risain hadien ba la pdiang ka iing dorbar thawain ia ka ain mait kyrteng ka Prevention of Disqualification (Members of the Legislative Assembly of Meghalaya) Act, 2015, u la pynpaw ia ka jingsngew dukha mynsiem ia ka jingmih ka rai na u Lat ka jylla.
Wat la, ym pat ioh ban pule ha kti ia ka hukum na u Lat ka jylla, hynrei na ka liang u Bah Metbah, u la ong ba ka jingpdiang ka sorkar ia ka ain, ka paw mynta ba la shah ialam bakla.
“Ngam pat ioh ban iakren ha ka party hynrei nga sngew ba ka dei ka jingbakla ka sorkar ban pdiang ia kane ka ain”, la ong u Bah Metbah.
Ha ka hukum ba la pynmih da u Lat ka jylla u V Shanmuganathan ha ka 31 tarik Jymmang, 2015, ka la ong ba katkum ka jubab ba la phah da ka Election Commission ha ka 16 tarik Jymmang, 2016, ka la pyni ia ki daw u Bah Pynshngain N Syiem uba dei u MLA um lah ban ong ba u bat ia ka ophis ba ioh jingmyntoi hapoh ka sorkar katkum ka Artikil191 (1) (a) jong ka Riti synshar ka ri bad u Bah Pynshngain N Syiem uba long u CEM um shym ngat satia ha ka kyndon mait kyrteng katkum ka artikil 191 (1) (a).
“Katkum ka jingai jingmut ka Election Commission, nga shim ia ka rai katkum ka artikil 192 (1) ka Riti synshar ka ri ba u Bah Pynshngain N Syiem,  MLA, um shym la ngat ha ka ain mait kyrteng katkum ka artikil 191 (1) (a) ka Riti synshar ka ri”, la ong u Lat ka jylla ha ka hukum ba la pynmih.
“Ngin leh ia kaba donkam pyrshah ia ka sorkar jylla kaba la ialam bakla ia u paidbah, ngin sa iashong ha ka jingialang jong ka party bad ngam pat lah ban kren bun halor kane”, u la ong.