Ba thep jubor da ka Hindi, ujor AIR ka KSU, FKJGP

Shillong, 28 Jylliew:
Ka Khasi Students Union lem bad ka Federation of Khasi Jaintia and Garo People (FKJGP), ki la phah ia ka jing ujor jongki sha U Director General ka All India Radio, New Delhi, ha kaba iadei bad ka jingkhot thung kam, kaba iadei bad ka kam prokram Executive bad Transmission Executive, kaba la mih ka jingpyrshah jong kiba bun ki nongwad kam jong ka dong shatei Lam Mihngi bad jong ka Meghalaya ruh kumjuh.
La iathuh ba ha ka Part B, ki don ar tylli ki song jingjubab bad kitei ki dei ka Paper I bad ka Paper II, ha kaba la ai ia ka kyntien ba kin jubab, ha ka hindi lane ka English lane da kiwei pat ki kyntien, kiba la ithuh ha ka 8th Schedule. La ong ba u nongialeh, lada u shim da ka English, ha ka Paper I, um lah ban shim biang da kajuh ha ka Paper II bad u hap ban shim da ka hindi, ne da kiwei pat ki kyntien kiba dei ha ka 8th Schedule.
La ong ruh ba ki nongialehkai eksamin, ki la ioh ia ka jingai jingmut, ba kin shim noh da ka ktien hindi pynban, kaba dei ka ktien kaba kim ju pyndonkam bad katei ka la buh jingeh, namar ba la ong ba katei ka jingleh, ka dei kaba hap ban pynbeit noh, ba kan nym jia shuh nangne shakhmat.
La iathuh ba ki kam, kiba dei ban thung ha katei ka ophis, ki long 5ngut ki Khasi, 4ngut ki Garo bad uwei na Jaintia bad sa uwei na bynta ka prokram English bad uwei na bynta ka ktien Hindi. La soi ia katei ka jing ujor da U bah Joe Marwein President FKJGP bad u bah Daniel Khyriem President KSU.