Shah kem uba ai kam thok, u lah kamai bun lak tyngka

Jowai, 31 Jymmang:
Uwei u briew uba la tip kyrteng kum u Armos Pasam uba shong basah ha Nongthymmai Lawjynriew, u la shah kem mynta ka sngi ha ki pulit ka West Jaintia Hills halor ka jingdonkti jong u ban thok ban shukor ban ioh kamai da ki lak tyngka na ki samla wadkam wadjam kiba shah pynbieij ba u lah ban iarap pyniohkam bad thungkam ia ki ha ki ophis sorkar bapher bapher.
Ia utei u briew la iohkem nyngkong da ka seng Hynniewtrep National Youth Front (HNYF) Mawlai Circle na Anjalee, Shillong bad la ialam ia u sha Jowai namar ba mynta ka sngi udei ban siew ia ka pisa kaba u la shim na kawei ka longkmie hadien ba ka khun jong ka kam shym la ioh kam satia wat hadien ba u la dep ai lut ia ki kot ki sla kaba kynthup ia ka Appointment letter.
Utei u briew u dei uba shyrkhei bha ban thok bad bun bah ki samla khlemkam naduh na Jaintia, Mawlai bad wat haduh Ribhoi District ki la ngop ha utei u briew bad ki la duhnong palat lakh tang na ka daw ba baroh baroh ki kwah kam sorkar palat.
Kiba la shah thok ha utei u briew ki kynthup ia ar ngut ki khun jong ka kong Mistalin Mukhim kaba shong basah ha Dongmihsngi, Jowai, ka kong Glora Dkhar.
“Nga don ar ngut ki khun kiba la dep pule. Kawei ka khun jong nga ka pule ha Guwahati bad ka lok jong utei u briew ruh ka pule lang bad ka khun jong nga bad dei hangta ba ki la ia ithuh bad u la kular ban pyniohkam ia ka hapoh NEIGRIMS. Kane ka la jia naduh u snem 2013”, la iathuh ka kong Mistalin.
Katkum ka Appointment order kaba utei u riew thok u la ai sha kitei ki samla wadkam ka tulop jong ki ka long 30 hajar tyngka shibnai.
Utei u riewthok, um tang ba u la thok ia ki samla wadkam hynrei u la shna seal tuh bad soi kyrteng tuh (Forge) ia ka jingsoi kyrteng jong ki Officer ka tnad Soil and Water Conservation Department, Medical Officer, NEIGRIMS bad ka tnad Railway jong ka sorkar India.
Ka jingioh kamai jong utei u briew ka long bun lakh. Na ka kong Mistalin Mukhim T. 102000/- na ka kong Glora Dkhar T. 20, 000/- Nalor kitei ki ar ngut, utei u nongthoh nongshukor u la ioh kamai ruh na ki samla Mawlai kiba kynthup na ka Viconia Thangkhiew, Fulfill Thangkhiew na Nongpoh uba dei ban ioh kam hapoh Indian Railways, Karnel Thangkhiew bad na kawei ka samla ka bym la ioh kyrteng satia.
U la shim pisa 1 lakh 40 hajar, 1 lakh 30 hajar, 40 hajar bad 20 hajar bad 50 hajar na kitei ki saw ngut nalor kaba la dep siew da kitei ki ar ngut na Jaintia Hills. Ka Gracy Mukhim na Nongpoh u la ioh 50 hajar tyngka. Lada kheinlang baroh utei u nongthoh u la ioh kamai bun lakh tyngka.
Kitei ar ngut ki longkmie na Jowai, ki la dep ban ban ujor ejahar ha Jowai PS pyrshah ia utei u briew bad kitei ki samla na Mawlai bad na Nongpoh kin sa ujor ejahar lashai ka sngi ha ki Police Station ba ha jan, ong u President ka HNYF, u bah Sanbor Rapsang, u President ka HYNF Mawlai Circle.