Pyllait im ki Waheh Shnong ia u rangbah ba shah rong umsaw

Jowai,31 Jymmang:  Uwei u rangbah uba kyrteng u Wom Pyrtuh uba na ka shnong  Moorap,West Jaintia Hills  khlem poi pyrkhat  shuh ban un iohi  biang ia ka sngi ha ka jingim ka jong u  namar ha ka 28 tarik mynta u bnai u la shah rong ha ka umsaw bad katei ka jingjia ka la jia ha wah Myntang,West Jaintia Hills District  hynrei donbok ba u dang eh ka bok ka nusip  lah ioh ban pyllait ia u  da ki briew kiba dei na ka shnong Mukhla.
Ha katei ka sngi katto katne ngut ki briew katba ki dang muja ka khwai ha katei ka wah  Myntang, kyndit kyndit ki lah iohi ia uwei u briew  u lah shah rong ha kane ka wah bad mar kumta  kine ki rangbah kiba iakhwai hangne ki lah pyntip lyngba ka mobile phone  sha u Waheh shnong ka Mukhla  Sohshrieh u Ma Orlando Sari   bad kumta bran bran une u waheh ryngkat bad ki paralok jong u ki lah hiar sha kane ka wah kaba don katei ka jingjia.
Haba poi ha katei ka jaka, utei  u waheh  shnong jong ka  Mukhla Sohshrieh  bad ki paralok ki jong u da ka mynsiem  ba shlur bad khlem riej ia ka jingim laj ong ki lah rynsied sha  wah  ban patan bad pyllait im ia u tei u rangbah  na kane ka wah bad ka jingialeh ban pyllait ia une u rangbah ka lah shim por  haduh shikynta shiteng  namar ka jingkhlain palat jong ka Umsaw bad ka jingther jong u Lapbah. Katba ka jingialeh ban pynlait im ia une rangbah ka dang iaid shakhmat donbok ba lah wan poi sah ki pulit jong ka Ummulong Police Beat House na Ummulong kiba lah wan ai jingiarap lang haduh ban da pynlong ia utei u rangbah ban lait im shisyndon.